Aizawl January 11, 2023: Vawiin khan Chief Minister Zoramthanga ruahmanna in, I&PR Minister Lalruatkima, Transport Minister TJ Lalnuntluanga, K. Laldawngliana, MLA leh MNf Gen. Headquarter Vice President Vanlalzawma, Ex-MP/MLA te chuan Zohnathlak (Bawm) Mizoram-a himna zawnga lut te dinhmun Parva III-ah an enfiah a, an mamawh tur te zirchiangin raltlante (refugee) awm lailawkna hmun pawh an tlawh.

Parva III ah hian Public meeting neih nghal a ni a, Minister zin te hian raltlan te tan pawisa leh an mamawh tur bungrua te an pe nghal a, khawtlang hruaitute nen inkawmna neiin hmalak zel dan tur leh an mamawh an lo sawi te a tul anga sawrkarin a ngaihtuah zel tur thu an sawi.

Chief Minister mi tirh te hian an thil hmuh dan leh a tul ang te chu Aizawl lama sawrkar hotute a bik takin Chief Minister an sawipui dawn a, a rang thei ang berin ruahmanna siam zel a nih tur thu an sawi bawk. Raltlan te pawh mahni inpui ah thlamuang taka awm tura an duh thu an hrilh. Harsatna awm apiang khawtlang hruaitute leh NGO te hrilh hre zel tur leh a tul dan anga SDO (Civil) Chawngte hnenah pawh an harsatna leh an mamawh thlen zel turin an chah bawk a ni. 

He hunah hian Raltlan te tana hmalakna kal mek tui khawlna PHE lamin an buatsaih leh thil tul dangte pawh en nghal a ni. Sawrkar aiawha awm official te nen inkawmna hun an nei bawk a ni. Minister zin te hi SDO (Civil), Chawngte leh SDPO, Chawngte in Lawngtlai DC remruatna angin an lo dawngsawng a ni