MINISTER CHAWLHTIR A NGAI, VANDUAITHLAK KAN TI - MNF vice president
Tualchhung
Feb 08, 2023
ad
ad
Vawiin ni 8.02.2023 chawhnu khan MNF Vice President Lalthlengliana chuan Siaha Bazarah MNF Siaha District Hqrs. buatsaih public meeting a hmanpui a, Siaha MNF party boruak chungchang a sawi.
 
Lalthlengliana chuan Siaha-a thil thleng chu mumang pawha man a nih ngai loh thu leh politics-ah crisis a awm fo thu a sawi a. "Tun MNF ministry-ah minister chawlhtir a ngai hi kan duhthusam a ni lova vanduaithlak kan ti hle a. Sawifiah a ngai a ni," a ti.
MNF Sorkar a lo pian khan Siaha MLA Dr K. Beichhua chu portfolio tha tak pein Siaha District development atan a kutah thuneihna sang tak dah a ni, a ti a. "12th Mara Autonomous District Council-ah hian MNF MDC (9) leh INC MDC (4) ten sorkar siama an thawhho mek laiin, ni 25.11.2022 khan MNF MDC 5-te hriat lohin, Minister (Pu Beichhua) hovin (MNF MDC 4 dangte nen) party duh dan ni lovin MADC Sorkar an move tla hi a pawi hle a. Chief Minister thu anga MADC Sorkar paihthla niawma an sawite hi thu belhchian dawl lo a ni.
 
"Ram khat chief minister meuhin MDC 9-te chu MDC panga leh paliin va thendarh la, sorkarna va tichhe rawh a tih chu tumahin an awih lovang. Tin, a ti bawk hek lo ang. Party thuneitu sang NCC leh PAC ten thutawp siam tur an nih laiin 'CM-in go ahead' a ti tia MNF MDC 9-te tihphel hi party pawi sawina lian tak a ni. Thenkhat thlauhthla zawnga kal hi thil tih chi a ni ngai lo a, rem pawh kan ti lo," tiin disciplinary action lak a nih chhan a sawi.
 
MNF vice president chuan party danga la chhuak ve ngai lo, hotu senior-ten ngun taka ngaihtuahin minister atanga chawlhtir tul an tih thu a sawi a. "Hetiang hi MNF-ah a thleng khat khawp mai. Hrem awm chi ngawih ngawihte pawh hrem lohin an awm fo thin," a ti.
 
"Politics-ah chuan mi pakhata tluk luh thuk lutuk a tha ngai lo. A huhova kalpui chi a ni. MNF atanga banna thehluttute hian an ngaihtuah chiang lo a ni. Lo kir leh hram se kan ti. He bialah hetiang boruak hi a thleng fo tawh a, party-ah an lo kir leh thin. Pu Beichhua ngei pawh hi lo kir leh se kan ti hle.
 
"MNF hian harsatna kan tawng fo, 'A tho leh tawh lo ang, a ral ang,' tiin an sawi thin. Mahse ral a hnehin sorkarna kan siam mek a, kum 2023 inthlanah pawh sorkarna kan siam leh ngei kan beisei. MNF hi a nghing dawn lova, Pathian leh kan ram tana thawktute hi kan pung zel dawn a ni," tiin Lalthlengliana chuan MNF mipuite chu lunghnur lo leh chiai lo turin a chah a ni.

Latest News & Chhiar Hlawh