Aizawl: December ni 9-13, 2019 chhunga Mizoram state games, Aizawl a neih tur chu Zirtawpni khan Taxation Conference hall-ah Sports & Youth Services Minister Robert Romawia Royte hovin Sports Association Presidents te, State Level Monitoring leh Organising Committee Members ten an sawiho.

Inkhawm kaihhruaitu Sports Minister chuan State Games atan Zoram thalai leh infiammite an phur avangin lawmthu a sawi a. Hnam bil emaw, pawl bil hming emawa punkhawm ang ni lovin hnamtin pawltin huapa intawhkhawmna tur State Games chuan Zoram dung leh vanga thalaite a tih pumkhat tur thu a sawi.

Sports & Youth Services Secretary leh State Games Organising Committee Chairman ni bawk H. Lalengmawia pawhin Mizoram State Games lo awm tur chu Council of Ministers thutluknaa buatsaih tur anih thu leh Mizoram leh Central sawrkar tanhonaa buatsaih tur a nih thu a sawi a. Game 32 awmin event 221 zet a awm dawn a, Zoramin State puitling anih hnua a hmasa ber tur anih thu sawiin MLA te an phur avangin a hlawhtling mek tawh a ni, a ti.

Mizoram State Games hi State puitling kan nih hnua a hmasaber tur niin Infiammi leh Officials 10,000 vel pung khawm tura beisei a ni a. Sports Discipline hrang hrang te inkhelh ni leh khelhna hmun turte, dan leh hrai hman turte chu Technical Handbook sem darh tawhah tihchian vek a ni tawh a, Games chung-changa hriat duh nei tan Mizoram State Games Office, Sports Directorate Building, MINECO near MPSC Office ah a zawh fiah theih a ni.