Aizawl: Sports Minister Robert Romawia Royte hovin nimin khan College Venga Football field leh Republic Vengthlanga J.Thankima College Compound a Multi Utility Centre sak tura rawtna hmun enho a ni.
Minister chuan Mizoramah Standard Volleyball Court neih ve tul a tih thusawiin Mamit-ah Rs 1200 lakh senga sak mek bakah Aizawl remchang laiah International Competition pawh khelh theihna tur din tumin sawrkarin tan alak mek thu a sawi a. Mualpuia Sports Hostel chung zawma sak rawtna awm chu duh anga a len tawkloh avangin Ramhlun Sports Complex hmun a sa turin sum dilchhuahnana DPR siam vat tum anih thu a sawi.
College Veng area chhunga awm Venghlui Football Field tihchangtlun dan tur pawh Sports Minister ho hian a hmunah enho a ni a, Parking hmunpui leh mipui mamawh hmunhma siam tel theih anih leh nihloh te a field a thuneitu te leh Department Engineer ten lo enho se tiin thu dah a ni.
Republic Vengthlanga awm Govt J.Thankima College ten an College mamawh sawrkara an thlen mek pawh a hmunah enhovin State Budget pawnlam atanga sum hmuh theihnan DPR siam tura hma alak pui tur thu Minister chuan a hrilh a, Republic Vengthlang Local Chairman leh Branch YMA tepawhin vengchhung mamawh Minister hnenah hian an lo thlen a ni.
Sports Minister hi Er H.Lalzirliana MLA, K.Liantlinga; Vice Chairman,Social Rehabilitation Board, Lalsangliana Director of Sports, C.Laltlanthanga,Secretary Mizoram State Sports Council leh midang ten an tawiawm a ni.