Aizawl: Mizoram Pradesh Congress Committee chuan Chief Minister leh MoS Robert Romawia Royte te chu sawrkarin inkaihhruaina a siamte an zawm lo nia sawiin mipui himna leh hriselna an tiderthawng a ni, an ti.

Nimina thuchhuah an siamah MPCC chuan Chief Minister Zoramthanga leh Sports Minister Robert Romawia Royte te hian December ni 10, 2020 (Nilaini)-a Kawrthah, Tuidam leh Mamit khawpuia Pradhan Mantri Jan Vikas Karyakram (PMJVK) sum hmanga sports tihchangtlunna tur lungphumna hun an hmannaah Union Ministry of Health and Family Welfare-in 'Guidelines for Quarantine Facilities COVID-19' a siam zûlzuia Mizoram sawrkarin Standard Operating Procedure (SOP) a siam palzutin mipui punkhawmna an huaihawt nia sawiin, 'Hei hian Mizoram mipui himna MNF sawrkarin a ngaih pawimawh loh zia a ti lang chiang hleah Congress Party chuan a ngai a ni,' an ti a. COVID-19 hripui len laia mipui hriselna tiderthawng zawnga mi tlemte hlawkna tur sum siamna project hmanga inhampuar tawh lo turin an ngen tih an sawi bawk.

MNF thuchhuah chuan sawrkarin pungkhawm tur zat a bituk aia tam mipui an kohkhawm avangin Social Distancing kalpui theih a ni lova. Thingtlang lama Village Level Task Force (VLTF) ten an khuaa haw tur leh tlawh turte laka an phut COVID-19 Negative Certificate pawh Chief Minister leh Sports Minister team-te hian an nei lo a; khawtual mite leh Chief Minister team-te hi nasa taka an in awm pawlh avangin Mamit District mipuite chu COVID-19 hrileng lakah dinhmun him lovah an din tir niin an sawi bawk.