Mipui rorelna humhim tum inti Myanmar sipaiten mi 16 that leh

Admin - Mar 28, 2021

Sipaite hian ram pum nena tangrualin mipui rorelna humhim dan tur a dap a, inthlan pawh kan huaihawt ang. Mipui rorelna kan paih thlak chhan hi Suu Kyi-i leh a kaihhruaiten dan lova thil an tih vang a ni.

March 28, 2021 - Myanmar-a venhim  hna thawktute chuan sipai sorkar hotuluten nimina Armed Forces Day an hman niah, sipai sorkar duh lotu mi 16 lai an that leh nia sawi a ni.

Yangon khawpui leh khawpui dang dangah sipai sorkar duh lohna lantirin mipui an pung khawm leh a, mi 16 kah hlum leh an ni.

Sipai sorkar hotu, Min Aung Hlaing chuan an ram TV-a nimina Armed Forces Day puala thu a sawiah ‘mipui rorelna humhim nan’ hma an la tih a sawi a, inthlan pawh an huaihawt dawn thu a sawi a; mahse, a hun a sawi lo.

February 1-a sipaiten mipui rorelna paih thlaa thuneihna an hnehchhuh hnuah anmahni duh lotu mi 320 chuang an that tawh.

Sipai sorkar hian an ram mipui, anmahni duh lotute chu an vau na sawt hle a. Zirtawpni pawh khan sorkar TV chuan mipuite chu a hmaa chetna avanga mawl taka nunna chânte atanga inzir fing tur leh a nih loh chuan an lu leh hnungah kah mai theih reng an nih thu a puang.

Sipai hotu, Min Aung Hlaing chuan thuchah a sawiah, “Sipaite hian ram pum nena tangrualin mipui rorelna humhim dan tur a dap a ni,” a ti.

“Tharum nena chetna hian himna leh ngialnghehna tiderthawngin, chet chhuah a ngaih phah thin,” a ti.

Mipui rorelna kalhmang anga hruaitu atana thlan, Aung San Suu Kyi leh a kaihhruai, National League for Democracy-in dan lo anga thil an tih avangin hetiang hian an chet a ngaih phah ta niin a sawi bawk.

Sipai hotu hian anmahni duh lotute tih let nan kah phalna (shoot-to-kill order) an siam em tih a sawi chiang lo va. A hma chuan mipui lam atanga silai kah an tawn thin chhan let nen an hmet puak ve thin niin an insawi thin.

Armed Forces Day hi kum 1945-a Japanese-ten an ram an lut lo do let tura an beih tan ni champhaa an hman thin a ni.

Sipai kalrem lâm an huaihawt thin chu ram dang hotute pawhin an hmanpui thin a. Kuminah erawh Russian Deputy Defence Minister Alexander Formin chian ram dang mi pawimawh a tel.

“Russia hi thian dik tak a ni,” tiin Min Aung Hlaing chuan a sawi.

US, UK leh EU chuan sipai roreltute hi a hrek mek a. Tun hnaiah Myanmar leh Russia ram venhimna lamah an inkawmngei thar hle a, Moscow hian sipaite training a neihpui bakah ralthuam pawh a leitir thin.

Share now