Aizawl February 2, 2024 : Mizoram Pradesh Congress Committee chuan vawiin hian Congress Bhavan ah political session an nei a. He huna thusawitu Vice-President Lalnunmawia Chuaungo chuan, Hun a inthlak danglam a, mipui te mamawh leh duhthu sam te pawh a inher danglam a ni. Mipui te beisei leh duh dan an lungkham ram an thlenna tura an duh te hriatthiam a, address chat chat theih a pawimawh a ti.

Chuaungoa-a chuan, "Tun hma chuan Cong leh MNF kha duhtlan tur a ni mai a, kalphung a ni. Party mal supporter te vote ringot in Sawrkar-na siam turin a tlin theih loh, neutral te awn lam lam a ni mai.

Mipui ten min rin tawk turin hmachhawp kan neih a ngai a ni. Mipui ten Congress hi kan ram leh mipui tana thawk turin ZPM aiin an tha zawk a ni an tih turin tan kan lak a ngai a, kan rilruah kan vawn a ngai a ni.

Sawrkar khalh ngiltu Assembly chhungah mai ni lo pawnlamah te, nitina kan khawsak kawngahte kan ni dawn a. Congress party hi keimahni inchhek arbawmna tur ni lovin ram leh hnam, mipui te tana thawk tu kan ni a. Ram rawngbawlna kawngah theihtawpin tan kan la chhunzawm zel dawn a ni.

Ram leh mipuite tana pawi tur sawrkar in a khawih a nih chuan mipuite thlavang kan hauh ngei dawn. Sawrkar dinglai sawisel ngawr ngawr kan thlurbing dawn lo, ram leh mipui te tana tha tur thilah, ram leh mipui te pawikhawihna thilah chuan kan enliam mai mai dawn lo.

Congress hi ram leh mipui ten harsatna hrang hrang an tawh atanga khaichhuak thei tura kan ngaih a ni. Sawrkar mek te an policy te theih tawpa tihhlawhtlin tir tura nawr tur kan ni.

Gujarat ah kum tam ka thawk a, Sawrkar kalphung hrefiah tawk turin ka inhria a ni. Mizoram ah kan lo chhuak a, chung thilah chuan tluk lohna tam tak kan nei a ni.

Mizo te hi hnam danglam tak potential nei tha tak kan ni a, kan bawhlam bawh vak mai kan ni a, a chhia leh tha pawh intihmuh zung zung chi kan ni a. A tha lam zawnga kan kal vek chuan hmasawn zawnga tlan zawt zawt thei kan niin ka hria.

State dang aiin Mizoram hian Officer fel a percentage in la ila kan ngah zawk ber ang. Mizo te hi tifuh zawngin kal lawklawh ila chu theihna hi kan nei a ni. Mizote hi hnam changkang tak, State changkang tak nei thei niin ka hre tlat a ni.

Mizoram in advantage kan neih te kan hman thiam chuan State dang neih ang nei lo mahila hmasawnna kan thlen thei. Chung ti thei tur chuan hma kan la thei a ni.

Thil tha tak tak tithei tura party awm chhun nia ka hmuh tlat avangin Congress hi thlang ka ni a, Congress hi secular party a nih piah lamah hnam hnufual te chimrala awm lova hma an sawn theihna duhtu an nih vanga zawm ka ni.

Congress party hi kan dinhmun hniam mah se, Pathian duhdana kal kan nih phawt chuan dinchan hun kan nei dawn a, Pathian rawngbawlna zauzawk nei thei turin kan ding chang leh ang," a ti.