ZALEN February 26, 2025 : Mizoram Poor Federation chuan sum lakluh ang zela awmna tur Ration Card siam a ni chu lawmawm an ti a, hetih rual hian khawtinah mirethei ten an chanvo tur dik tak an chang em? tih hriat chian an duh avangin zin chhuah an tum tih an sawi.

Mizoram Poor Federation chuan FCS&CA Minister B. Lalchhanzova’n Miretheite leh Zoram mipuite dinhmun hriat chian nan sum lakluh ang zela awmna tur theuh Ration Card-ah an awm theih nan hma a lakna Cabinet-in lungrual taka an pawmpuinaah a bikin Miretheite an lawmin an lung a awi an ti.

Supplies Minister pawh an kawm tawh thu an sawi a, thahnem a lo ngai hle tih an hriatin an lawm takzet a, amah leh an sawrkar tawiawm tura min sawmna chu lawm taka pawmin naktipah a hmasa ber atan Champhai District-ah bul tanin Mirethei ten an chanvo tur dik tak Ration Card-ah an awm em? tih te hre tura zin chhuah an tum tih an sawi.

Poor Federation chuan, "Kan khawsakna dinhmun a zira Ration Card eng/pawla awm tur ni si, Ration Card vara awmte leh Ration Card vara awm tur ni tawh awm tak Ration Card eng/pawla awmte pawh an la awm thei a, kan sum lakluh leh khawsak dinhmun ang zela kan nihna dik tak Ration Card kan neih hi a thianghlim a, kan khawsak dinhmun a zira Card eng/pawl atanga Card vara kan insawn hian Mi harsa zawkte tan hmun kan kian tih hi hria ila, Kristian kan nihna nen pawh a inmil hle a ni," an ti.

"Retailer thenkhat chuan Ration latute hnenah, thla thara buhfai an lak duh chuan thla hluiah an kutzungpui nem a ngaih thu te, thla hluiah an kutzungpui an nem loh avanga thla tharah an Quota a thlen loh thute an sawi thin niin kan hria a, hei hi Inbumna a ni tih mipuiin kan hriat a tul a, hetiang thil hi tawk kan awm a nih chuan min bialtu DCSO-ah a zawhfiah theih zel a ni," an ti bawk.