January 11, 2023; Vawiin January ni 11 hi Mizoram a missionary hmasa ber pahnih Sap Upa (Rev. FW. Savidge) leh Pu Buanga (Rev. JH. Lorrain) ten kum 1984 a Mizoram an rawn luh champha, Missionary Day a ni a, Baptist Kohhranten hmun hrang hrangah an hmang a, tukin zing dar 7 khan Sap Upa leh Pu Buanga te awmna thin, Thingpui huan tlang, Zarkawtah, Zarkawt Presbyterian Kohhran huaihawtin hun an hmang a, Baptist kohhran mi engemawzahin an telpui.

He hun hi Upa VL Hruaia Zarkawt Kohhran chairmanin a kaihruai a, Rev.F. Lalhmingthanga, Dawrpui bialtu pastor in thuchah a sawi. "Helai hmun hi pioneer missionary ten kum 1894 January thla a Aizawl an lo thlen a, an awm zui takna hmasa ber niin, Mizo kristian zawng zawngte tan hmun pawimawh a ni," a ti. Rev. Dr. K.Thanzauva, BCM hruaitu hlunin tawngtaina hun a hmang a, Zarkawt kohhran mi 200 vel zet telin, BCM pastor leh Upa leh member, an vaiin mi 15 vel an tel bawk. 

Zarkawt Kohhran Zaipawlin Halleluiah Chorus an sa a, Rev.R. Vanlalnghaka, Chanmari bialtu pastor, Synod Moderator Elect in malsawmnain a tin. Zarkawt Kohhran Pavalai ten thingpui leh a hmeh an buatsaih a ni.

He tlang, High School Field leh Zarkawt Presbyterian biakin awmna hmun pawimawhna :

1. Pipute huna ramhuai hnena inthawi thinna 'Bawlhmun' thin a ni.

2. Pioneer Missionaryte Sap Upa (FW Savidge) leh Pu Buanga (JH Lorrain) an lo thlen hnuah (i) Mizo A Aw B min siam zawh sakna (ii) Mizotawnga Bible min lehlin sak tanna (iii) Sikul hmasa ber, biakin a hman nghal an sakna  hmun a ni.

3. Missionaryte lungphun leh a laia Kraws pu lungphun sang bik panga tiau lung mam te te belkhawmte hi Mizoram lui lian deuh deuhte atanga lakkhawm an ni.

5. A hmun hma neitu chu Mizoram Presbyterian Kohhran a ni a, a cheibawl leh enkawltu chu Zarkawt Presbyterian Kohhran a ni.