June 10,2022; Ramhlun South thlanmual, Muanna veng Aizawl a mi chu, tu tih hriat loh ten suasamin, thlan engemawzah an tichhia a, pawi khawihtute hi zawn mek an ni.

Ramhlun South Branch YMA hruaitute hnen atanga ZALEN thudawn danin, thlanmual suasam a nih hun tak hi hriat mai theih a ni rih lo a, vawiin (June 10) lam khan mitthi an nei a, chumi buaipui a thlanmual kal hmasa ten an hmu a, nizan lam thil thleng a nih rin a ni.

Misual tu tih hriat loh te hian thlanmual a thlan hrang hrang 15 bawr vel an khawih nia hriat a ni a, a tlangpuiin, thlan a pangpar inkhawite an tihchhiat bakah, mitthi hming ziahna kraws te tichhia in, a letling zawngte in an phun a, thlanmual in lam erawh an khawihlo a, waiting shed 'Pu B Daniala chawlhbuk' pawh an khawih chhe nual bawk.

He thu ziahlai zanin lam thleng kha chuan Police ah FIR thehluh a la ni lo a, hetihlai hian police lamin Ramhlun South YMA hruaitute biain, chinchang an ngaihven tawh a, he thil thleng-ah hian a veng neitu Muanna veng branch YMA chuan hmalakpui an tum a, anni lam hian chhuichhuah har lutuk a nih an rin loh bakah, pawi khawihtute chu zawnchhuah theih mai an inring nia thudawn a ni. 

Ramhlun South Branch YMA hruaitute chuan an thlanmual suamsam a, thlan engemawzah tihchhiat a ni chu a rilru natthlak hle tih an sawi rualin, thinrimthlak an tih thu an sawi a, pawi khawihtute chu zawn chhuah ngei an tum tih an sawi bawk.