December 6, 2022; Kum 2023 inthlanpui atan party hrang hrang ten beihpui an thlak chho mek a, thla liam ta November chhung a party lian 3, rorellai MNF, INC leh ZPM ten Aizawl press club kaltlang a thuchhuah an siam a tarlan a nih danin, ZPM chu mithar lawmlut tam ber an ni. Hetihlai hian November thla chhung khan Congress party chuan bial pathum a an candidate tur an puang.

Rorellai MNF party chuan nakum inthlan lo awm tur pualin tunhnaiah programme lian tham siam la nei rih lo mah se, hmun hrang hrangah block conference erawh an hmang chho mek a. Party hruaitu thenkhatte pawh hmun hrang hrangah an zinchhuak deuh reng a, hetihlai hian hruaitu lawk zualte erawh an la tawmim deuh rih niin a lang. October thla chhung khan MNF party a lawmluh mithar 828 an nei.

Congress party pawhin an president thin, Lal Thanhawla a chawlh hnuah MPCC OB thar ten Mizoram district 11 an tlawh chhuak tawh a, November thla chhung khan an president Lalsawta leh MLA dang ten mithar 467 an party lawmluh an nei.

Congress party hian November thla chhung khan bial 3 a an candidate tur an puang a, chungte chu Siaha biala an candidate tur N Chakhai, MCS (Rtd), South Tuipui bial a ding tur Er. C. Laldintluanga, Hnahthial Model veng leh, Serchhip bial a ding tur MNF headquarters a secretary ni lai, congress zawm ta Vanlaltluanga te an ni.

Tun dinhmunah Mizoram hmun hrang hranga beihpui thlak ngawrh ber chu ZPM an ni a, a bik takin an leader Lalduhoma leh an working president K. Sapdanga te an chechhuak nasa hle. Anni hian November thla chhung khan hmun hrang hrangah mithar 3,884 lawmluh an nei.

MNF party lamin SEDP an sawi uar chhunzawm zel a, party dangte thusawiah tui a tlin tak tak loh thu te, an party an beihna thu hrang hrangte a dawrawm thu te bakah, inthlan lo awm leh turah pawh varparh arsi a en zual zel tur thu te chu hmun hrang hranga an sawi tam a ni.

Congress party lam chuan kumin 2022 krismas bak hi MNF sorkar hnuaiah kan hmang tawh dawn lo tih an sawi uar thung a, Congress sawrkar laiin Mizoramin hmasawnna hmel nasa tak a hmuh thin thu te, a tluk a awm ngai loh thu te an sawi uar a, tunhnai khan nakum inthlan lo awm tur atana an Manifesto No. 1 an lo tlangzarh tawh bawk. Congress party hi kumin kum bul atanga thawkrim berte zing a mi an ni a, kumin chhungin mithar lawmluh pawh mi thahnemtak an nei tawh a, press conference leh programme lian tham siam nasa ber pawl pawh an ni.

ZPM lam chuan an policy hmanga ram a dinchhuah theihna tura an sawi thin thil pali te - thlai thar lei, vegetable supply chain, bultanna pek leh loan an lak theih nana guarantor-a din, chutiang sawrkar chu an chhawp dawn tih te chu an tlangaupui nasat a ni. A bik takin an leader Lalduhoma leh working president K. Sapdanga te an thawkrim hle a, Mizoram hmun hrang hrangah an kual reng a, mithar an lawmluhte pawh hi anni pahnihte lawmluh deuh vek an ni.