May 29, 2023; Inthlanpui neihna atan thla 6 tha vel chauh a awm tawh a, party tin te tan tawh viau laiin, tun hnai ni 10 chhung vel a mithar lawmlut tam ber ni a lang erawh rorellai MNF party an ni.

Aizawl Press Club facebook group kaltlang a party tin te thuchhuah atanga a lan danin, May ni 24, 2023 Nilaini khan Chief Minister leh MNF President ni bawk Zoramthanga chuan Serlui MNF Joint Block Conference vawi 6 na, Vairengte Multipurpose Hall a neih a hmanpui a, MNF zawm thar mi 798 a lawmlut nghal. 

Zoramthanga chuan MNF in an party zawm thar zat te hi a dik takin an sawi thin tih sawiin, party thenkhat chuan sangkhat anga sawi mai an duh leh ngei ang a ti. Lawmluh zat dik tak zel chauh sawi turin kalkhawmte a ngen nghal bawk.

May ni 23, 2023(Thawhlehni) hian Lengteng South Block : South Zone chuan Chhawrtui Community Hall-ah political training programme an hmang a. He hunah hian Lengteng Bialtu MLA Dr. L. Thangmawia, MNYF Hqrs President ni bawk chuan mithar 294 a lawmlut bawk.

May 20, 2023 khan ZPM leader Lalduhoma chuan Dampa bial chhung atangin 455 a lawm lut bawk a, hetihlai hian congress lam chuan tunhnai ah mithar lawmluh an nei lutuk lo niin a lang thung.

May 29, 2023 a Hrangtûrzo West Block Conference, Khawlailung Community Hall-a neihah Lalsawta, Congress party president chuan Hrangturzo bial chhung khaw hrang hrang atangin mi thar 106 a lawm lut a. Nimin vek khan Dr. R.Lalthangliana health minister chuan Lunglei 'E' leh 'W' Tuipui atangin mithar 942 MNF-ah a lawmlut bawk.

Mithar lawmluh hi thil tihphung a ni ve reng a, party mite chawhphurna atan te bakah, inlawmluh programme hrim hrim neih hi party tan chuan hlawhtlinna pawimawh tak a ni ve hrim hrim bawk ang.