Aizawl: FCS&CA Minister K.Lalrinliana chuan, "Mitin hian mahni zawn theuhah faina leh thianghlimna kawngah mawhphurhna kan nei vek a ni," a ti.

Minister K.Lalrinliana chuan Zirtawpni khan Kolasib St.Joseph’s Parish Hall ah thingtlang khawfai inelna Swachh Survekshan Grameen 2019 chu Kolasib District tan a hawng a, thu sawiin, "Sawrkar laipuiin faina leh thianghlimna a vei a, Mizoram-ah pawh faina kawngah nasa takin hmalak chhoh a ni a, hemi kawnga hmasawnna kan neih te chu thil chhinchhiah tlak tak a ni," a ti. Minister chuan PHE leh UD &PA Department te chu thingtlang leh khawpuia Swachh Bharat hmalakna keng-kawhtu, mipui zirtirtu an ni a, kawng hrang hrangin sawrkar, pawl leh khawtlang ang ten hmalakna a awm a, faina leh thianghlimna pawimawhna te kan hre chho zel hi thil lawmawm tak a ni a. Sawrkar hmalakna reng rengah mipuite hian mawhphurna kan nei tel ve a, kan mawhphurhna kan hlenchhuah ve a ngai a ni," a ti bawk.

Swachh Bharat Mission (Grameen) Chairman leh Kolasib Bawrh-sap ni bawk Zoengsanga pawhin thu sawiin, "ODF a kan inpuang thei hi thil lawmawm tak a nih rualin kan ODF dan te hi belhchian dawl a ni em tiin mahni kan inzawh fo a ngai a. Faina kawngah tun aia hma kan lak lehzual a pawimawh a ni," a ti.

He hunah hian Kolasib District chhunga thingtlang khawfai ber Phainuam chu lawmman pakhatna hlan an niin Rs 40,000/- leh memento pek an ni a. Pahnihna chu Serkhan niin Phaisen chu pathumna a ni.