Aizawl May 8, 2024 : Mizo Bawngsa Zuar Association chuan Mizoram chhungah hriat theih ata tawh ram leilung faten Bawngsa zawrh hmanga eizawnna an lo kalpui tawh a, amaherawhchu hun enge maw chen atang khan hnamdang bawngsa zuar hmuh tur an awm tan a, May 13, 2024 hnu lam ah chuan hnamdang dan lova sumdawn nan a Bawngsa zuar tu zawng zawng te, lo inthiar fihlim tur leh lo zuar ve tawh lo tur in an inhriattir.

Mizo Bawngsa Zuar Association President H. Lalhmingthanga chuan, "Theihtawp a inkhap in kan han in dang ve thin a, awmzia pawh a nei in a sawt viau, nimahsela tunhnai deuh atang khan hnamdang phalna nei lova Bawngsa zuar an rawn pung chho leh tan a, veng hrang hrangah hmuh tur an awm ta nuk mai, a bik in veng thenkhat ah kristian te ni serh Sunday pawh min zahsak lova bawngsa zuar hmuhtur an awm ta fo mai a, heng hnamdang dan phalloh a Bawngsa zuar te hi kan ngaimawh a, hnawk pawh kan ti hle a ni," an ti.

H. Lalhmingthanga chuan, "May ni 13 2024 hnu lam ah chuan hnamdang dan lova sumdawn nan a Bawngsa zuar tu zawng zawng te, lo inthiar fihlim tur leh lo zuar ve tawh lo tur in kan inhriattir a, mizo mahni hming hawh tir te leh hnamdang in thurualpuitu te pawhin titawp tur in kan inhriatir bawk a, he thu ngai pawimawh lo a tilui te chu an chung ah engpawh thleng se an sawi buai thei lovang, Vengtin YMA te Local Council te leh Veng mipui te, kan ram leh kan hnam hma hun atan, minlo thlawp vek tur in kan sawm," a ti.

Sazuar te chuan hnamdang Bawngsa zuar ho hi Vai Muslim leh Bihari deuh vek an ni a, phalna an neih hriat a ni lo, an ILP han chhui chian chuan ILP pek an nih na anga hmang lo, cement mistiri, helper leh Construction work dang dang a thawk tur a rawn lut te an nitlangpui hlawm, phalna neilova Mizoram a hnamdang in sumdawnna lo tih ve ngawt hi dankalh a ni a, dan palzut na leh ram leilung fate chanvo in chhuhpui na lian tak a ni, an ti.