August 9, 2022; August ni 2, Thawhlehzan dar 6:30 a Sihhmui kai, Leidawh bul a chesual C. Lalfakzuala (39) leh a fapa Malsawmkima (10), Chaltlang Lily veng te zawn hna chu Mizo dan anga ni 7 zawn an nih hnuah hmuh an nih loh vangin, vawiin chawhnu dar 3 khan, 'A nawlpuia zawn hna kharna inkhawm,' Sihhmui lei ah Central YMA buatsaihin neih a ni.

He hun hi Central YMA vice president Lalhmachhuana'n kaihruaiin, vanduaina tawk chhungkua atangin, Mafaktea nupui, Rebecca Lallawmzuali bakah a unaupa John Lallianzualan thu an sawi a, an vanduaina kar a Mizo nunzemawi lo lang chu ropui an tih thu te, CYMA ruahmanna anga che chhuak zawng zawngte chungah an lawm takzet thu te leh, Mafaktea te pafa chu chhungkaw lam chuan an zawn chhunzawm reng dawn thu te an sawi.

Central YMA GS, Prof. Lalnuntluanga'n report pe bawkin, Sihhmui branch YMA aiawh a thusawitu chuan a nawlpuia zawnna hun khar nimahse an lo mitmei chhunzawm reng tur thu te, ni 7 chhung ruang zawn hna an thawh hnu a hlawhtlinna an hmu lo chu pawi an tih thu leh zahthlak an tih thu a sawi a. Sihhmui branch YMA aiawh a thusawitu chuan, tui tla zawnna tur hmanraw hrang hrang an nei tha lo tih a sawilang tel bawk.

Central YMA president R. Lalngheta pawhin, Mafaktea te pafa zawn chhunzawmna kawngah Central YMA chu pun theih reng an nih thu leh an inhuam reng dawn thu sawiin, tuitla zawnna hmanraw hrang hrang ngaihtuah kawngah sawrkar lo awm tawh leh awm mek ten hmalakna an neih tawk loh avangin, mamawh leina tur thawhkhawm turin mimal leh pawl te a sawm. 

"Kan duhthusam kan thlen zawh loh avangin, chhiattawk chhungte hnenah Central YMA hmingin ngaihdam ka dil a, vanduaina kar a Zonunzemawi lo parchhuak erawh a ropui takzet a ni," a ti.

A nawlpui a Mafaktea te pafa zawn hna kharna inkhawm neih ah hian Chaltlang bialtu Commanding officer Maj. J. Liankhaman hunserh a hmang a, huntawp Maj. T. Vanlalnghakan hmangin, Chaltlang leh Lily veng corps band ten hun an hmang bawk.

Sihhmui lei leh a chhehvel ah mipui thahnemtak an kalkhawm a, ram hruaitu zingah, P&E minister R. Lalzirliana, Vanlalhlana MLA, Zothantluanga MLA, Dr. ZR. Thiamsanga MLA te an tel.

Tlai dar 3 vek khan Sairang balukai, Buichali lei, Mualkhang, Khamrang, Hortoki leh Bairabi ah pawh hun hman a ni bawk.