Mipui nghahhleh Mizo Film Award 2023 sem hun tur chu tihchian a ni ta - September 29, Zirtawpni zanah sem a ni dawn. Mizo Film Award 2023 atan hian inbuatsaihna pawh ngawrh taka kalpui mek zel niin, film chhuak a tam avangin endik hna pawh a hautak tham hle. 

Kuminah ringawt pawh film chhuak thar a awm leh teuh tawh a, film siam tam lamah chuan hma kan sawn hle. Chutih rual chuan a tam lamah nge a quality-ah teh tur tih erawh ngaihdan hrang awm thei a ni a, hma kan sawn tih erawh phat rual a ni lo - sum leng vak pawh a tam sawt hle. 

Film of The Year
Mizo Film Award hi Tlau Entertainment buatsaihin December 2021 khan sem a lo ni tawh a, hemi hnu lama film chhuakte hi kuminah chuan a huam dawn a ni. December 2021 leh August 2023 inkara Mizo film chhuak zawng zawngte a huam dawn tihna a nih chu. 

Kuminah hian category thar a awm belh dawn a, chu chu Film of The Year a ni. He award hi kum khat chhunga film chhuak zinga tha leh mipui ngaihhlut ber hnenah hlan a ni dawn a, a hlu khawp ang le. Film of The Year 2022 hian December 2021 leh December 2022 inkara film chhuak a huam dawn a, Film of The Year 2023 chuan January - August 2023 inara film chhuak a huam thung ang.  

Mizo film hi kum khat chhungin 30 bawr vel zet a chhuak ve tawh a, award buatsaih sak pawh an phu tak zet tih a lang. Mizo thalai tam takin eizawn nan an hmang chho mek a, film industry luhchilh kan intihhmuh chho zel a nih pawhin a mak lo ng. 
A ngaihnawm dawn!

December 2021 atanga December 2022 inkar khan Mizo film hi 30 vel zet a chhuak a, kuminah pawh film eng emaw zat a chhuak leh tawh. Heng zing atanga hian a tha ber ber thlan chhuah a ni dawn a, a ngaihnawm dawn!

Film tam zawk chu mipuiin kan ngaihven leh man chawi pawha kan lei ngamte an ni hlawm a, chawimawina dawn phu tak tak an ni. Chutih rual chuan award hi mi zawng zawng tan dawn vek theih a ni lo a, a tha filawr ten an dawng thin. Mizo Film Award 2023 sem turah pawh film chhuak atam avangin award dawn a harsa dawn a, hei hi a tihlu zualtu a ni ngei ang.