Aizawl August 23, 2024 : Vawiin khan Mizo Hnam Rúnah chhung inkhawm neih a ni a, he huna thusawitu MNF Adviser Lalringliana (Executive Corporator, AMC) chuan August 22, 2024 AMC Ward-VI Bye-Election tluang taka neih a ni chu lawmawm a tih thu a sawi a, Mizo hnam puanzar hnuaiah ngei Mizo hnam hla sak hun hi a thleng a rin thu a sawi.

Vanduaithlak taka John Zosangliana Ralte boral avanga Bye-Election neih a ngai ta chu pawi a tih thu sawiin, MNF tan channa nasa tak a ni a ti. A hmunruak luahkhat tura a Nupui Lalrinfeli (MNF & MPCC) Candidate intawm atana ruat a ni chu thil tihawm tak a nih thu sawiin, thawhhona tha tak hnuaiah inthlanna tluang takin neih a ni a ti. Lalrinfeli Vote-tu zawng zawng chungah MNF chuan lawmthu a sawi a ni, a ti bawk.

Ringa chuan Zoram mipuite chu, 'Zofate'n leirem an rah theihna turin tute nge thawkrim ber, tute nge hrehawm tuar nasa ber,' tih hre thar leh tura history enlet turin a ngen a. Hnam hmangaihna rilru hi a ral thianglo tih hre thar tur leh chu rilru chu an put thar leh a tul thu sawiin; Thangthar rilru sang tak finnate hman thiam a tul thu uar takin a sawi. A hun mil zelin India sawrkar hnuaiah awm rih mah ila, Mizo hnam puanzar hnuaiah ngei Mizo hnam hla kan sak hun hi a thleng ngei ang, a ti.

Remna vawngnung a, rinawm taka ram tana thawktu, ram lo hruai tawhtute an fakawm a, remna leh muanna avanga rama hmasawnna tam tak thleng tawh leh thleng mek te hi hmuh hmaih lovin, hmalam pan zel a, hmasawnna nasa zawk thlen tirtu ni turin MNF te inbuatsaih sauh sauh turin a ti bawk.

MNF Joint Secretary Lalthanchhunga chuan AMC Ward-VI Bye-Election neih chung chang report pein; khaw chhia leh chhiatna hrang hrang vanga vote tla a that loh thu sawiin, 47.38% vote a tlák thu leh Pathian leh Ward-VI Mipuite zarah beiseina sang tak an neih thu a sawi.