March 17, 2023; Vawiin MNF party office, Mizo Hnam Run chhung inkhawm a hunserh hmangtu, fak hla satu mi hliat hlawh ta, Joseph Zaihmingthanga'n, nuai tam tak seng a inleitlin ai chuan dikna nen a tlin loh a ngaihsanawm zawk tih a sawi. 

He inkhawm kaihruaitu MNYF vice president Zodinpuia chuan, Vanlalsailovan ZPM a zawm tak vanga hunserh hmang tura Joseph Zaihmingthanga sawm an ni lo tih sawi hmasa in, Sailovan party a zawm hma daih a ruahmanna siam fel a nih tawh thu a sawi. 

Hunserh hmangtu Joseph Zaihmingthanga chuan, Chanchintha hi kan champion pui tura Pathian min pek a ni tih sawiin, vawiin a kan dinhmun hi en i la, ram tana beitu inti te hian party chhunga kan thahnemngaih dan hi Lalpa tihna hnuaiah a ni tak meuh meuh tih ngaihtuah thin turin kalkhawm te a chah.

"Lal kan duh luat avanga kan thil tih hi en i la, Pathian tihna hnuaiah a ni em? Kan campaign au hla zawng zawngte ngaihtuah i la, tu sawrkar hnuaiah pawh thil an tiam a, tih leh a awm chuang si lo a, tih awm tei vet thin te hi... hei ringawt pawh hi Pathian tihna hnuaiah thil kan ti lo a ni mai lo maw tih ka rilru ah a awm," a ti bawk.

Lalpa tihna hnuaiah chuan dawt a tel thiang lo a, thudik chanve a tel thiang lo a, thudik hrulah pawh a tel thiang lo tih sawi bawkin, "Lalpa tihna nen chuan ni chu ni, ni lo chu ni lo a ni ringawt tur a ni. Dawt leh thudik hrul a chutiang hmachhuan a tlin ai chaun Lalpa tihna avanga tlin loh hi a hlawk zawk hrim hrim," Joseph Zaihmingthanga chuan a ti.

Mizoramin tam kan tuar a, Assam lam atangin tanpuina a lo kal thei si lo a, tam tuar mipuite tan Mizo Famine Front a lo ding a, hun a lokal hret a, chu chu MNF tiin party pakhatah din chhuah a lo ni ta tih sawi bawkin, "Vawiin ah hian kan tihtakzetna hi khatih hun lai MNF a lo pian laia tihtakzetna nen khan a la in ang angem?," tiin, "Politics kan zuanluh hian tihtakzetna nen a zuanglut nge kan nih a, eizawnna atana zuanglut. Eizawnna a ngai a hamthatna leh therhlo melh kar chung a politics a zuan luh hi hnam hmelma lian ber a ni,"

"Ram hi a tha zawnga chhete tala a lo danglam phah ve theihna tur a nih dawn chuan retheih leh ka rethei mai ang, tawrh a ngaih leh ka tuar mai ang ti khawp a tihtakzetna thinlung pu mi kan ram hian a mamawh a, chu chu Pathianin a zawn pawh an ni," a ti bawk.

"Party workers, MLA leh minister te hi ngun takin in en i la, unit kan enkawlna ah te, kan bial vawn danah te hian kan dik tak meuh em. Mipui rawng kan bawl dan te hian a khairual em, sawrkar hnathawk kan lak dan te hi a dik tak meuh em,"

"Engatinge inthlan dawn a piang a nuai chuti zat sen ngai anga kan ngaih tak tlat...dikna nen a ram siamthatna thinlung kan pu pha lo ta em ni ang tih hi ngaihtuah tham a ni,"

"Ram siamthatna tur atana ram hmangaihna a zuanglut chuan, dik taka sawi chuan a nuai tel a invawm hi a tul kherin ka ring lo. Nuai tam tak seng a inlei tlin ai chuan dikna nen a tlin loh hi a ngiahsanawm zawk hrim hrim," Joseph Zaihmingthanga chuan a ti.