ZALEN July 23, 2025 : Mizo Hnam Run Lunglei-ah Dampa AC MLA Lalrintluanga Sailo, Aizawl a vui mek chu a sunna hun hmanna neih a ni. Minute khat ngawi renga sunna neih niin Lalrintluanga Sailo kalsan tak, a nupui fanau, a tu leh fate, Dampa bial mipuite tan Pathian hnenah tawngtai rual an nei.

MNF Core Committee Member Lalrintluanga Sailo sunnahun hi MNF Sub Hqrs Lunglei a hruaitu hlui rual engemawzatin an hmanpui a ni. 

Sunna hun hi hun vawngtu MNF Sub Hqrs Lunglei President Vanlalhmuaka President chuan "Hnam Pasaltha, Mizoram leh Hnam tan a lo ram mu tawhte an liam teuh tawh a. Vawiin a kan thlahliam Pu Lalrintluanga Sailo pawh hi kan Hnam pasalthate zing a mi, ram leh hnam tan a theih tawp chhuah a ke pen tawh, pen mek niin MNF tan phei chuan mi uiawm berte zinga mi a ni a, Mizo Hnam leh MNF a din chhung chuan theihnghilh ni a awm tawh lovang. A kalsan a nupui fanau, tu leh fa, a bial mipuite thinlung takin kan tawrhpui tak zet a ni." a ti. 

Hmuaka chuan, "Kan ram leh hnam insingsa mek leh inthial mek hi kan thalaite, nu leh pa ten kan chik ngun hi a tul hle mai. Ram leh hnam vei tak taktute mual an liam mek a, kan hmabak hi ngun tak a kan chhut a pawimawh hle a ni. Ram leh hnam tan lo ram mu tawh Pu Lalrintluanga Sailo kan thlah liam mek lai hian, an thinlung leh ngaihtuahna, an inpekna te chhutin, kan ram hmakhua, hmabak, tun a kan ram kal mek dan ngaihtuah i la. Chen zel ngamna, chen zelna tlak boruak leh khawtlang nun muanawm kan neih zel theih nan kan ram politics inlumlet mekte hi i chhut ngun teh ang u," a ti bawk. 

Vawiina Lalrintluanga Sailo sunna hunah hian Z.H. Ropuia, Ex Minister chuan thlamuanna thuchah sawiin, Lalrintluanga Sailo kalsan tak, a chhungte leh MNF party tan Pathian awmpuina leh kaihruaina a dil sak bawk a ni.