Aizawl June 29, 2023 : Vawiin khan Mizo National Youth Front (MNYF) Kolasib Block buatsaihin Kolasib Block MNF Thalai Conference neih a ni a. He hun hi MNYF Headquarters President Dr. L Thangmawia, MLA chuan Khuallian niin a hmanpui a, MNF chu Mizo hnam tana political party din awmchhun niin a sawi.

Dr. L.Thangmawia MLA chuan, "Mizoram ah political party tam tak alo ding tawh a, Mizo hnam tâna din awm chhun erawh chu vawiin thlengin MNF chauh a la ni", a ti.

MNYF President chuan, "India rama political party tam takin kum 60 an tlin theihloh lai a MNF-in kum 60 chuang a upa a nih theihna chhan hi mi chaklo leh tlinglo te min hruai thintu Pathian vang chauh a ni. Mizote hnam a min dintu hian tum neiin min kaihruai a, a mite enkawltur pawhin hruaitu ropui tak tak min pe thin a ni," a ti bawk.

Thangmawia chuan party dangte aia MNF in hruaitu an neih that thu sawiin, "MNF founder President Pu Laldenga kan hria a, kan ram leh hnam tâna a beih nasat zia pawh kan hria ang, tunah Pu Zoramthanga min pe leh a, hruaitu tha chuan vision tha a nei tur a ni. Leader tha ni tur chuan mi ho khawm thiam nih a ngai leh a, party dang atanga an hruaitu lawk apiang la lut thei hruaitu kan nei hi MNF vanneihna a ni a, hemi kawngah hian vawiin a political party Leader kan neih zingah MNF President Pu Zoramthanga tluk an la awmlo a ni," a ti bawk.

He hunah hian K Lalrinliana, Kolasib bialtu MLA leh Minister ni bawk chuan Congress leh ZPM atangin MNF zawmthar mi 144 la lawmlut a, Kolasib bialtu MLA Pu K. Lalrinliana, Minister chuan, kan ram tana beitu leh nunna hlantute'n ram tâna an lo beih tawhna zawng zawng kha keini ho hian a thlawnin kan luan raltir tur a ni lo a. Pathian leh kan ram tan titu kan nihna hi a hmasaber ah kan dah a ngai a ni, tiin kalkhawm te a chah bawk a ni.