Aizawl January 30, 2023: Congress party ten thil man sang chak, hnathawh tur nei lo pung nasa leh sakhaw intluktlanna atana September 7, 2022 atanga kawng zawh an buatsaih, Bharat Jodo Yatra chu Mizoram-ah pawh vawiin khan a kharna neih a ni a, MPCC President Lalsawta chuan Mizoram tan he kawng zawh hi a pawimawh a ti a, Mizo hnam tel lohna India a kim thei lo a, India pakhat Mizoram mipuite telna kan duh a ti.

Congress Party hruaitu Rahul Gandhi hovin September ni 7, 2022 (Nilaini) atang khan Kanyakumari, Tamil Nadu atangin India ram chhunga thil man sang chak lutuk (inflation), hnathawh tur nei lo pung nasa (Unemployment) leh sakhaw intluk tlanna (secularism) kawngzawh chu nimin ni 29.01.2023 (Pathianni) khan zawhna ni a, vawiin khan a kharna hun hman a ni. 

Mizoramah chuan Bharat Jodo Yatra hi Pathianni a nih avangin Vawiin ni 30.01.2023 (Thawhtanni) hian Congress Bhawan kawt Aizawl-ah hun hman a ni a. Kharna huah hian MPCC President Lalsawta chuan, "He kawng zawh hi Mizoramah hlei hlei a pawimawh, Uniform Civil Code leh Citizenship (Amendment) Act, 2019 te hian Mizo te hi a sirah min hnawl hret hret a, min luahlantu an awm chho mek zel a ni. Political Party hrang hrang, Kohhran leh NGO te tanrual a ngai takzet a ni," tiin, "Mizoram hi India ramah kan la awm miau avangin Mizoram mipuite tel lohna, Mizo hnam tel lohna India a kim thei lo a, India Pakhat, Mizoram mipuite telna hi kan duh a ni," a ti bawk.

Bharat Jodo Yatra kharna pui ber hi 29.01.2023 (Pathianni) khan Lal Chowk, Clock Tower (Ghanta Ghar), Srinagar ah hman ni a, Rahul Gandhi chuan India hnam puanzar a pawt pharh. H he hmunah hian kum 75 kal ta khan Prime Minister hmasa ber Jawaharlal Nehru chuan India hnam puanzar a lo pawt pharh tawh a ni. Kawng zawh kharna hun hi State hrang hranga Congress Party te chuan anmahni hmun theuhah an hmang bawk. 

Bharat Jodo Yatra hi September ni 7, 2022 khan Kanyakumari, Tamil Nadu atangin tan a ni a. Jammu & Kashmir thleng ke a kalin 29.01.2023 (Pathianni) khan a tawp a, ni 137 chhungin state 12 leh Union Territory pahniha district 47 paltlangin km 4,080 a thui ke in an kal a ni.