Aizawl : March 18, 2023 zan khan Mizo film thar 'Black Rose' chu Vanapa Hall, Aizawl ah tlangzarh a ni a, khuallian Art & Culture Minister R. Lalzirliana chuan Khawchhak leh khawthlang film-ten min run mek nia a hriat thu sawiin mizo khutchhuak ngei uar zawka en a tul tih a sawi.

Khuallian chuan, Mizoram mai ni lovin khawvel ah movie en nasat anih thu sawiin, zirtirna tha nei tam tak a awm laiin thenkhat erawh chu nun tichhethei an nih avangin fimkhur zawk a movie en tur te thlan thiam a ngai a ni, a ti. Khawchhak leh khawthlang lam film-ten nasa takin min run mek nia a hriat thu sawiin mizo khutchhuak ngei te pawh uar zawk a en a tul a, hah tak leh sum leh pai tam tak senga siam anih avangin an thawhrimna chawisan theihna pawimawh tak a ni a ti. 

Zira chuan, Mizo film tam tak ah mizote nundan phung leh ziarang tarlanna a tam tawk lo a, zo zemawi leh ziarang tarlang thei film tam zawk siam turin mizo film buatsaih thin te a ngen bawk.

Minister chuan hnama chian a pawimawh a, nupui pasal zawn kawngah pawh fimkhur zual a tul a ni, a ti. Hnamdang kawppuia thlan hi hnam ralna pakhat a nih avangin kawppui thlan kawngah hnam anga thanharh a tul a tih a sawi bawk a ni. Mizote chu hnam huaisen, tlawmngai, rinawm leh thawkrim an nih thu sawiin khawvel huap pawh a hnam ropui a nihna phochhuak turin kalkhawmte a sawm nghal a ni.

Black Rose hi Joseph Lalchhanhima, CK Hyundai neitu chuan a tlangzarh a, Danny Vanchhawng film producer in report pekna neiin, Melody G. Fanai chuan kalkhawmte hnena lawmthu sawina a nei a ni.