ZALEN September 17, 2023 : Intellectual Property Right hnuaiah Mizo kutchhuak atangin Patent pahnih, Trademark 16, Copyright pariat leh Geographical Indication panga te tihfelsak an ni tawh.

Mizoram Science, Technology & Innovation Council (MISTIC) Governing Body chu an chairman, Chief Minister Zoramthanga hovin an thukhawm a, he hunah hian Patent, Trademark, Copyright leh Geographical Indication te tihfel a nih thu hi sawi a ni.

Meeting-ah hian Principal Scientific Officer Samuel Lalmalsawma chuan MISTIC hnathawh hrang hrang, research & development lama an hnathawh mek te, capacity building lama an hmalakna te, innovation leh technology deployment lama an hnathawhte bakah science chawi larna lama an thiltihte leh Covid-19 len laia mipuite mamawh hmalakna an kalpui dan report a pe a, chumi hnuah an kal zel dan tur hmachhawp leh MISTIC thuam chak zelna tur thil hrang hrangte an rel zui a ni.

MISTIC hian Mizoram mipuite mamawh tur science leh technology hmang zirchian ngai leh hnathawh ngai hmalakna tam tak a kalpui a. Kuhva tihrona te, Solar Cold Storage te, Hydroponic Fodder cultivation (tuia ranchaw chinna) te, Disinfectant- Hypochlorite, chi (salt) atanga siamna te leh hmalakna dang tam tak an kalpui a ni.