Technology lama hmasawnna chuan India hmarchhak kil khawr pawh a rawn thleng phak zel tawh a, application thar chi hrang hrang hmuh tur pawh a awm ve ta nual mai. Lailen Consulting Pvt. Ltd. chuan Zo rimawi ngaihthlakna tur app thar Darbu chu download theihin an chhawpchhuak ta rup mai le - May 20, 2022 (Zirtawpni) zan hian official-a tlangzarh a ni ang. 
 
Darbu hi music & audio application niin, a thlawna rimawi ngaihthlak theihna a ni. He app-ah hian Mizo hla chi hrang hrang a awm dawn a, tunah hian hla eng emaw zat dah luh tawh a ni nghe nghe. Zaimite tan a hlu zual dawn a, an hlate chu local cable TV leh YouTube lamahte a thlawna pe chhuak ngawt tawh loin man chawia ngaihthlak theih turin an dah thei tawh dawn a ni. He tianga zaimite tana platform changtlung tak mai a awm ta hi chanchin lawmawm tak a ni ngei ang. 

Internet khawvela sumdawnna kalphung pakhat chu freemium hi a ni a, YouTube, Spotify leh app dangte pawhin an hmang - ngaithlatu leh entu an tam dan a zirin sum lakluh theihna a ni. Darbu-ah hian thil hlawm lian tak pathum - library, exclusive release leh store te a awm dawn a, libray hi streaming platform niin, exclusive release chu albu realse thar dahna hmun tur a ni. 

Heta album te hi hmun dangah copy chhawn theih a ni dawn lo a, mipuiin an leina atanga sum lut 90% chu artist ten an chang dawn a ni. Store erawh artist te sumdawnna hmun tur a ni dawn a, an kutchhuak eng chi pawh, bungrua pawh nise Darbu app kaltlangin an zuar thei ang. 

Darbu hi App Store leh Google Play-ahte iOS leh Android hmangte tan download tur a awm ve ve tawh bawk.