Aizawl: Kumin Republic day lawmna pui ber January ni 26.2023 a New Delhi a neih turah Mizo naupang 4- Vanlalfela, Jolyn Malsawmsanga, Lalramliana leh Christian Vannunzira te chuan President hnen atangin huaisen lawmman an dawng dawn.

ZALEN in Mizoram State Council for Child Welfare thawktute hnen atanga thu a dawn danin Vanlalfela, Jolyn Malsawmsanga leh Lalramliana te hi nikum lama huaisen lawmman dawng tura thlan tawh te an ni a, mahse hripui vanga Republic day lawmna urhsun taka neih a nih theih loh avangin kumin ah hian Christian Vannunpuia te nen a rualin an dawng dawn ta a ni.

Huaisen lawmman dawng tura thlan Lalramliana (11) s/o Lalrinchhana leh a thianpa Joseph Malsawmtluanga (13) s/o Suiliamkhama, New Hruaikawn khua te chu August 2, 2021 khan khua atang KM 1.5 vela hla Kurung luiah Mautuai khawrh tura kalin Mautuai an khawrh zo tui a an cheng chu Joseph Malsawmtluanga hi tuiah a tla a, Lalramliana hian tui tla chu chharin a Awm ah nemin thawk tir leh tumin vawi tam taka a nem hnuah a thianpa hi lo harh lehin a nunna a chhan a ni.

Vanlalfela (10) s/o Lalrinthanga, Thenzawl khua pawh hi a pa nen Nov. 24, 2020 khan an huan-ah hnathawka kalin an hnathawh zawh hnuah a pa chu chawhmeh zawngin tlang-ah a lawn chho a, a rawn chhuk lam chu a thingzar vawn chuan dawl zo lovin a lum a, a pa thi chhawnga awm leh thisen chhuak chu buaipuiin khawchhung lamah zualko in YMA te a pun hnuah mi tlawmngai ten an lak hnuah damdawi in panpui a ni a, a pa pawh hian ziaawm lam panin a huaisenna leh ngaihtuahna fing tak avangin lawmman dawng tura thlan a ni.

Jolyn Malsawmtluanga (15) s/o Lalmuankima hian Nov. 30, 2022 tlai khan Pukpui Health Sub-Centre a Ambulance hluihlawn tawha naupang infiam zinga mi Moses Lalruatfela (11) chu electric in a man a, naupang hi a chhanchhuah vanga huaisen lawmman hi dawng tura thlan a ni bawk.

Christian Vannunzira (9) s/o Rosangzuala, Chhingchhip Venghlun hi a unau 3 te nen an khua atanga metre 150 vela hla Chhungatuikawn an kal laiin Khawivanrial rualin an zuk a. An zinga mi Noel Vannunhlimi chu che hleithei lova awmin Christian-a a hian  hmanrua a hmuh ang ang hmanga chhanin a hnua maxi cab lokal ten an puih hnuah khuai hi hnawhkian an ni a. Naupang 4 te hi damdawi in panpui an niin Christian Vannunzira hi khuai hian a zuk nasat avangin ni 6 chhung enkawl a ni. A unau te chhan nana a hnathawh avang hian huaisen lawmman dawng tura thlan a ni.

Heng Mizo naupang 4 te hian January ni 17,2023 khan New Delhi an thleng tawh a, ruahman dan chuan January ni 30,2023 ah Aizawl an lo let ang a, January ni 31 ah Social Welfare Minister Er. Lalrinawma chuan a pisa ah thingpui a inpui dawn a ni. 

ZALEN thudawn danin huaisen lawmman dawngtu te hi Rs. 40,000 pek an nih bakah presen chi hrang hrang an dawng thin a. Chumai bakah pawl 12 an zir thlengin scholarship pek an ni a, vanduaithlak taka an boral anih chuan an unau ten an dawng chhunzawm thei a. Hei mai bakah pawl 12 an pass hnua technical line an kal duh anih chuan an tan seat reserve sak an ni bawk.

Mizoramah naupang huaisen lawmman dawng hi mi 40 an awmna a ni a, an zinga 13 hi thih hnua dawng an ni. Kumtin India ramah naupang 25 te huaisen lawmman dawng tura thlan thin a ni a, kuminah hian Mizo naupang 4 in an dawng dawn a ni.