April 27, 2023; Ahmedabad’s Navrangpura-a spa-a thawk, Mizo nula Rebecca Lalawmpuii (24) chu Hotel Krishna Palace-ah tun thawhtanni zing khan thi a hmuh a ni a, a ruang Mizoramah lak niin, Thawhlehni tlai dar 6 vel khan Kulikawn West ah vui a ni.

Phai lam media hrang hrangte tarlan danin, Rebecca Lalawmpuii hi Thawhtanni zing dar 7:10 vel khan Hotel Krishna Palace room 303-ah thi in hmuh a ni a. Bodakdev police-te chuan hotel a CCTV leh entry register-te enfiahin, thubuai an ziaklut.

Hotel staff-te sawi danin, mithi hi Pathianni zan khan Ghattoldia-a Sattadar Crossroads bula Karmcharinagar-a awm, a thian te Zohmingliana, Rafael leh Nishsant Kansara te nen Hotel Krishna Palace-ah an kal a, thla ruk kalta chhung khan a thiante nen hotel-ah hian an lo kal fo thin tih police hotute hnenah an sawi.

Bodakdev police-te chuan a taksaah hliam an hmu lo a, postmortem tih a a nih hnuin, a boral tuk April 25, 2023, Thawhlehni tlai khan Kulikawn West thlanmual ah vuiliam a ni.