Aizawl : Department for Promotion of Industry and Internal Trade (DPIIT)-in Mizo puan Mizote ta a ni tih chhinchhiahna, Geographical Indication (GI) tag/registration a pekte humhalh­tu tura Art & Culture department in a din, 'Committee on Inspection Structure for Geographical Indication of Traditional Mizo Puan' hnuaia Technical Sub Committee te chuan an zirchiang a, a kalpui dan turah thutlukna an siam fel thei lo niin Art and Culture Department chuan Zalen an hrilh.

Sub-Committee hian kumin August 16 & 22, 2019-a GI tag pek tawh Mizo puan panga - Puanchei, Tawlh­lohpuan, Pawndum, Ngotekherh leh Hmàrám-te hi ngun takin an zirchiang a, a humhalh dan tura tha nia an hriat te pawh an sawiho tawh a, mahse, anni hian thutlukna an siam thei lo a, commitee sang zawk ‘Committee on Inspection Structure for Geographical Indication of Traditional Mizo Puan’ lama sawiho leh tur a ni.

Heng puan te hi eng anga humhalh tur nge tih thutlukna erawh la awm lo a, tualchhung mi tan pawh eng angin nge an phalrai dawn tih an la sawi thei lo a ni.

Chhunglam atanga thudawnna chuan hnam kutchhuak te chu tihlar a ngai nia a hriat thu a sawi a, “Kan Mizo entrepreneur ten puan hi an hmang nasa a, kan local puan tahte an tana phalrai chin tur parameter tha tak neih a ngai a, kan phal zau a ngaihna lai a awm mai thei, a hmandan tur pawh felfai taka tih a ngai a ni,” tiin a sawi.