ZALEN June 23, 2025 : Mizo Language Development Board chuan A Aw B indawt dan tih danglam tumin hma an la mek a, he A Aw B ziah dan thar tur hi Aganwadi zirlaite chu a zir hmasaber tura ruahmanna siam a ni.

Vawiin IPR&PS leh MJA ten vawiin Media Workshop an neih naah Mizo Language Development Board Chairman R. Lallianzuala chuan, Mizo hawrawp A Aw B tihdanglam a nih tur chhan chu a hawrawp leh thumal lam dante tha an tih loh vanga tihdanglam tum an nih loh thu a sawi a, 'Ng' awmna hmun an sawn mai dawn a ni a ti.

R. Lallianzuala chuan tunlai software hrang hrangah, hawrawp inmil dana thil dah dawnin 'Ng' chu Mizo tawng hawrawp inrem dan angin a awm thei lo a, 'G' leh 'H' inkara awm thin 'Ng' chu 'N' leh 'O' inkarah sawn mai Mizo Language Development Board chuan tha a ti a, hemi atan hian thui tak hma pawh an lak tawh thu a sawi.

Sawrkarin thuneihna a pek angin Mizoram zirlai buatsaihtu SCERT pawh an dawr tawh thu a sawi a, anni lam pawh an inhawng a, A Aw B inrem dan zir hmasaber tur Aganwadi enkawltu Social Welfare & Tribal Affairs lam nen pawh an inbe tawh a ti.