Mizo tawng a ral mai lohna tur leh humhalh zel tur hian Mizo tawh phawt chuan mawhphurna leh tih tur kan nei vek a, kan mawhphurna erawh a inchen vek awm lo e. Kan tawng humhalh tur hian mi pawimawh tak tak an awm a, chung mite mawhphurhna chu tun tumah hian kan thlurbing dawn a ni. 

1. Thuziak mi : Chanchinbu leh lehkhabu ziak thinte hi Mizo tawng humhalh kawnga thawh hlawk berte zinga mi an ni. A tlangpuiin thuziak mi kan tihte hi chuan Mizo tawng an ziak dik a, humhalh duh bertu zinga mi pawh an ni. An pawimawhna an inhria a, mipui hnenah pawh a dik thei ang ber chhawpchhuah an duh thin, chhunzawm zel se a duhawm hle. 

2. Zai mi : Zai mite hi kan nuna bet tlat an ni a, nitin zan tina kan ngaihthlak thinte an ni. Zai mite mawhphurna hi a sangin a pawimawh tak zet tih hi kan hriat nawn thar leh a pawimawh hle. Anni pawhin an pawimawhna leh midang zirtir thei an nihna hi an inhriat a pawimawh. 
Tun hma deuh kha chuan hla thu lam hi an fimkhur tlangpui thin a, tun hnuah erawh ngaihthah deuh an rawn awm chho ta niin a lang. Mizo tawng dik lo bak sak lutuka hla an han sa hi chu a ngaimawhawm thin ngawt mai - a lar ber berte an ni duh viau leh nghal!
    
3. Recording Studio neitute : Mawhphurna an nei sang hle a, an pawimawhna an hriat nawn fo a ngai. Zai mite hla thu lam dik loh hrilh hre thintu tur an ni a, an en liam mai zel chuan a pawi hle ang. Mizo vek mah ni ila Mizo tawng kan thiam dan a inchen lo a, hre lo zawkte hrilh hretuah tan vek tum ila hma kan sawn ngei ang. 

4. Film siamtute : Film industry hi chu music industry ai chuan Mizo tawng hman dik kawngah an ziaawm deuh zawk niin a lang a, hma sawn zel turin tan la sauh sauh se a duhawm hle bawk. Mipuiin kan en tam an ni a, a changtute tawngkam hman tam tak hi a entute hian an copy zui duh hle. Hemi a nih avang hian tawngkam hman fimkhur a ngai a, an Mizo tawng hman a dik em tih a hre zawkte an zawh hreh loh a ngai. 
Film changtu zingah an tawngkam hman Mizo tawng dik a ni em tih pawh hre lo an awm thei a, chung hunah chuan film director ten ngaihthah mai lo a, tawngkam dik zawk an hrilh fo a pawimawh. Hetiang bawk hian film lettute mawhphurhna pawh a sang viau mai, hnamdang tawnga siam film lehlin a lar thin hle a, chung hunah chuan Mizo tawng dik hman hram hram a pawimawh hle. 

5. YouTuber : Tun laiah chuan TV ai mahin YouTube kan en nasa tawh zawk emaw tih tur a ni a, YouTuber te mawhphurhna a sang hle. Media firm lianah chuan mipui hnena an thupuanzar tur leh ziaka an thehdarh turte chu a dik em tih editor ten an enfiah hamsa thin a, punazar tlak an tih chauh an tichhuak thin. 
YouTube-ah erawh chutiang a ni ve tak tak thei thin lo. Mimal pawhin channel a nei thei a, a ngaihdan chu a dik emaw dik lo emaw pawh nise ama thuin a puangzar thei tlat. Hei tak hi fimkhur a ngaihna chhan leh an mawh phurhna sanna chhan pawh a ni a, Mizo tawng humhalh kawnga an mawhphurhna hi a namai lo hle. 
Heng bakah hian mipui hmaa thusawi thinte, milar kan tihte leh midang pawimawh tak tak sawi tur an awm teuh awm e. Mahni zawn theuhah Mizo tawng humhalh tura theihtawp chhuah vek i tum ang u.