ZALEN Feb 10, 2025; Hna hnuai hnung sawi loin, Zo Puakphur hnuaiah Mizo ṭhalaiten phur takin hna an thawk mek a, chung mite zingah chuan mahni inchawm, zirlai leh hna zawng mek tam tak an awm, hmeichhia pawh an bang lo.

ZALEN thudawn danin, Zo Puakphur-ah hian Mizo thlai mi 600 dawn inziak lut an awm tawh a, mumal takin an hnathawh tur ruahman sak an ni a, mipui mimir lam hriat an hlawh chhoh mek zel tawh avangin thawh tur an haihchham ngai lo tih theih a ni.

Zo Puakphur hruaitute chuan Pathian zarah ni khat tawp hna nei lo a awm an nei ngai lo tih ZALEN an hrilh a, an thawh tam ber chu insawn/bungraw thiar (office leh mimal) a nih thu an sawi.

"Ruahmanna a mumal phawt chuan Mizo thalaite hian eng pawh thawh an hreh lo, Mizo ṭhalai tumruh, mahni inchawm tum tlat, lehkha zir pah leh hna dang zawn pah a taima taka kan hnuaia thawk hi an tam, la hlawhtling tur, nakin lawk a hna ṭha zawk la hmu ngei tur a kan ngaih pawh an tam," tiin ZALEN an hrilh.