Senior National Weightlifting Championships neih mekah kg 67 huangah Mizo tlangval pahnihin medal an chawi chhuak a. Jeremy Lalrinnunga’n Mizoram tan gold medal lain Services tana chawi, Lalhunthara’n bronze a awrh phak thung.

Indian Weightlifting Federation (IWLF) buatsaih National Senior, Junior leh Youth Weightlifting Championships hi Ningani atang khan Itanagar, Arunachal Pradesh-a neih mek a ni a, January 7 thleng a awh dawn.

Kg 67 huangah hian Mizo weightlifter zinga hriat hlawh ber, Commonwealth Games 2022-a gold medalist, Jeremy-a hian Snatch-ah kg 136 leh Clean & Jerk-ah kg 162, a vaia kg 298 chawiin Mizoram tan gold medal a la a ni.

Jeremy-a ang bawka Army Sports Institute (ASI) atanga inzir chhuak, Lalhunthara hian Services hmingin Snatch-ah kg 121 leh Clean & Jerk-ah kg 163, a vaiin kg 284 a chawi a, bronze a la bawk.

Mizo tlangval pahnihte inkarah hian Andhra Pradesh rit chawi chak, Neelam Raju awmin silver medal a la a. Ani hian a vaiin kg 288 (Snatch-ah kg 126 leh Clean & Jerk-ah kg 162) a chawi ve thung.

Kum 21 mi, Jeremy-a hi kumina Hangzhou, China-a neih, Asian Games 2022-ah khan inlan tuma a inbuatsaih laiin Patiala, Punjab-a India camp-ah a inhliam hlauh va, hun rei tak chawlin tun tumah pawh hian a inhliam hma anga rit a la chawi chhuak thei lo deuh va, a rih zawng anpuiah tluktu an la awm chuang lo thung.