ZALEN Feb 24, 2025; Kerala-a Mizo tlangval vih hlum Valentine VL Chhana (23) Pangzawl ruang chu naktuk (25.2.25) - ah Mizoram thlen pui tum a ni.

ZALEN thudawn danin, VL Chhana S/o H Malsawmtluanga, Pangzawl, Hnahthial district ruang hi Kerala police te ruahmanna angin damdawiin-ah dah a la ni a, ruahman dan chuan vawiin tlai dar 3-ah postmortem a ni ang.

Hemi hnu tlai dar 6-ah Kerala a Mizo awm ten Wilson Vanramhluna (Chairman, Trivandrum Mizo Christian Fellowship) chenna In ah thlahna hun an hmang ang a, police ruahmanna vek angin damdawiinah dah luh leh a ni dawn a ni.

Ruahman dan chuan a ruang hi naktuk zing dar 6-ah thlawhna in Mizoram panpui a ni ang a, chawhnu dar 3 velah Lengpui Airport thlenpui theih beisei niin, an khua Pangzawl panpui nghal a ni ang.

23.2.25, Inrinni zan dar 11 vel khan VL Chhana hi a zirlai pui Mizo tlangval vekin a vit hlum a, amah hi Rajdhani Engineering College, Nagaroor, Attingal-ah B. Tech 4th year zirlai a ni.

Hetihlai hian a vit tu Lawmsangzuala, Kawlkulh chu Kerala police kutah a awm mek nia thudawn a ni.