ZALEN August 12, 2023 : Wushu avanga hriat hlawh, Patrick Hauhnar fapa te pahnih chuan Thlawhna pilot commander nihna an chelh ta ve ve a, Mizo zinga unaua Commercial flight commander ni thei hmasaber an ni.

Tun hnai khan Pilot George L. Hauhnar S/o Patrick Hauhnar (L), Tuikhuahtlang Aizawl chu Captain / Commander-ah a kaisang a, Indigo Airlines Airbus 320 a command tawh dawn a ni. George-a hian 2018 khan pilot hna hi a zawm a, tunah hian Bangalore-ah a inbengbel a, nupui a la nei lo.

George-a u Michael L. Hauhnar hian 2014 khan pilot a zawm a, a ni hi Delhi-a a inbengbel thung a, ani pawh hi Captain ni mekin tunah hian Air India-ah Boeing 737 a command mek thung. Michael pawh hian nupui a la nei lo bawk.

Hriat theih chinah tunah hian Mizo zingah Commercial Pilot hi pali an awm mek niin hriat a ni a, tun hnai hian pakhat a luh belh niin sawi a awm a, mahse, kan finfiah thei rih lo.