July 22, 2023; Mizo National Youth Front (MNYF) chuan Mizoram sawrkar leh tlawmngai pawl hrang hrangte’n kum 24 chhung teh meuh an buaipui tawh, Tripura hmun a Bru awmte Mizoram electoral roll atanga paihfel an ni ta chu lawmawm an tih thu an sawi.

Aizawl Press Club-a vawiin a thuthar thehdarhtute an kawmnaah MNF Thalai Vice President Zodinpuia chuan he thu hi sawiin, Mizoram electoral roll a awm thin Bru te, Mamit District chhung atangin voter 9130, Kolasib District atangin voter 1979 leh Lunglei District atangin voter 888, a vai a belhkhawm a voters 11,997 zet te chu Mizoram Electoral roll atanga paihfel an ni tawh tih a sawi.

Zodinpuia chuan, "Kum 24 chhung teh meuh Mizoram in harsatna kan tawh chinfel a nih theihna tura Chief Minister Zoramthanga leh a kaihhruai MNF sawrkar hmalakna te, Mizoram himna tura beidawnglo a theihtawp chhuah rengtu NGO co-ordination committee hmalakna zawng zawngte hi MNYF Headquarters chuan kan chhuang tak zet a ni," a ti bawk.