ZALEN August 14, 2025: Pachhunga University College chuan vawiin khan an college kum 67 tlin lawmna pualin, home hrang hrang 5 hnenah tanpuina Rs. 3,75,000/- an hlan.

PUC hi kum 1958 August ni 15-a din a ni a, a din ni tak hi holiday a nih avangin an college din cham lawmna inkhawm hi, vawiin August ni 14 hian an College seminar hall-ah an buatsaih a. An college dincham lawmna atan hian zirtirtute, non-teaching staff te, zirlai te, research scholar ten sum an thawhkhawm a, an sum thawhkhawm atang hian home hrang hrang panga hnenah 75,000 theuh an hlan.

PUC-in an hlan te hi - Operation Kingdom Ministry (OKM), Phunchawng, Aizawl; Thutak Nunpuitute Team (TNT), Zuangtui, Aizawl; Samaritan Riangvai Run, Seling; The Salvation Army Motherless Baby Home, Tuikual South, Aizawl leh Hermon Children’s Home, Durtlang, Aizawl te an ni a, a vaiin Rs. 3,75,000 an sem chhuak a ni.

College din cham lawmna hi Dr. Margaret Z. Khiangte, Vice Principal chuan a kaihruai a, Principal Prof. H. Lalthanzara chuan tanpuina hi a sem chhuak a ni.

PUC-ah hian UG course 22, PG course 5 awmin UG lamah zirlai 2412 an awm a, PG lamah zirlai 107 an awm mek bawk. Zirlai zingah hian state dang atanga lo kal zirlai 39 leh India ram pawn atanga lo kal zirlai 11 an awm a, hengte hi Nigeria, Uganda, Egypt leh Lesotho atanga lo kal te an ni.