3.4.2022; Oil transportation bill chungchangah Indian Oil Corporation (IOC) leh Mizoram a oil phurtu (transporter) te an inrem theilo a, hemi vang hian Mizoram a oil phurluh kawngah harsatna a awm mek. Mizoram sawrkar pawhin he harsatna hi IOC hotute hnenah a thlen tawh nia thudawn a ni.

All Mizoram Petroleum Dealers' Association (AMPEDA) hruaitute hnen atanga ZALEN thudawn danin, IOC in tun April 1, 2022 atanga hman tur tuialhthei (oil)0 phurhna man (transportation bill) a siam chu rate hmasa aia a chhiat vangin Mizoram a oil phurlut tuten an pawm theilo a, hetihlai hian hnamdang mimal oil phur ten rate hniam taka an chhanna chu pawmin, IOC lamin rate thar hmangin load an lo pe a, chung ang mite chu Vairengte ah an challan te enfiah sakin, dan mek te pawh an awm nia hriat a ni.

Hengte a nih vang hian Mizoram a oil rawn phurhluh dan a mumal lutuk rih lo a, IOC in tuna rate thar a rawn siam chu kum 5 chhung hman tur niin, rate hnuhnung ber chu kum 2015 a siam tawh kha a ni. "IOC lamah rate a that loh thu kan thlen tawh thin a, hetihlai hian tun dinhmunah chuan rate thar hman chungchangah kalphung mumal tak IOC lam pawhin a la kalpui rih chiah chuang lo," thudawnna chuan a ti.

Mizoram a oil phurh man chu rate hlui ang pawhin transporter te an hlawk tawh lo a, tun a rate thar chu a hma aiin a la chhe leh zawk a, tlem te pawhin a rate pun sela transporter lam chu an lungawi mai rin a ni.

Hemi chungchang hi tunhnai mai khan Supply secretary pawhin IOC hotute hnenah a thlen tawh a, state sawrkar pawhin Mizoram a oil phurtute chu a thlawp tha hle nia hriat a ni. AMPEDA hruaitute chuan Mizoram a oil phurh luh a tlem phah rih thu leh oil lama harsatna lian tham lutuk erawh a thlen a hlauhthawnawm rih loh thu ZALEN an hrilh.