Aizawl: Nimin zing thlang khan Mizoramah Covid-19 vei (positive) hmuh tawh zat chu 2,162 an ni a, dam tawh zat 1,974 niin enkawl mek 188 an awm bawk a, Covid vei tih dam zat (recovery rate) hi a sang zel a, dinhmun thar berah 91.30% a ni. Covid hri vei mek zinga mi 54 hi Mizoram mi leh sa an ni a, a dang 134 hi hnam dang nia thudawn a ni.

Zirtawpni zan khan ZMC RT-PCR laboratory-ah sample 130 test a ni a, positive 2 hmuhchhuah thar a ni a. District hrang hrang TrueNAT laboratory-a sample test zingah COVID-19 positive hmuhchhuah thar 1 a awm a. Rapid Antigen Test hmanga COVID-19 positive hmuhchhuah thar 2 an awm bawk.

ZMC RT-PCR laboratory-a positive hmuhchhuah tharte hi ni 9.10.2020-a sample laksak ve ve, Dawrpui mi 2, mipa kum 68 a upa leh hmeichhia kum 69 a upa, tunhnaia zinchhuahna (travel history) nei lo an ni a, hmeichhia hian symptom a nei a, hri an kaina tur awm ang hriat theih a ni rih lo. TrueNAT Laboratory-a COVID-19 positive hmuhchhuah hi Lawngtlai district ah mipa 1, kum 40 a upa, Silchar, Assam atanga lo kal niin, Border Roads Organisation hnuaiah driver a ni. Quarantine Facility a khunghran lai, symptom nei lo a ni.

Rapid Antigen Test hmanga COVID-19 positive hmuhchhuah thar hi Kolasib district-ah mipa 2, kum 30 leh 37 a upa, Hailakandi, Assam atanga lo kal an ni a. FCI Godown, Bairabi-a Mutia hnathawk tura lo kal, symptom nei lo an ni.

Tun dinhmunah Mizoramah Covod-19 case mipa 1787, hmeichhia 375, a vaiin 2162 a awm a. Mi 1974 chuan damin enkawlna hmun an chhuahsan tawh a, enkawl lai 188 an awm.

Zirtawp zana hrikai hmuh thar 2, Dawrpui veng te hi nupa an ni a, an kaina awm hriat a ni lo. Zalen in Dawrpui Local Level Task Force hruaitute hnen atanga thu a dawn danin positive hmuh thar 2 te hi mi fimkhur tak, pawn pawh chhuak vak ngai lem lo an ni a. An pa zawk hi tunhnaia Dawrpui South Welfare OB Meeting ah a tel avangin meeting a tel te swab sample hi lak tum a ni a, mi dang contact a neih hriat a ni lem lo niin an sawi.