Aizawl August 18, 2022: Vawiin khan Dr Pachuau Lalmalsawma, SNO, Integrated Disease Surveillance Project (IDSP) chuan Mizoram chhungah Japanese Encephalitis (JE) natna hmuhchhuah a nih thu thuchhuah siamin an tarlang.

Trinity Hospital, Aizawl atanga Japanese Encephalitis (JE) natna vei ni a rinhlelh leh bawhzuina kal zelah Health & Family Welfare Department chuan National Centre for Disease Control (NCDC), Delhi chu Mizorama JE natna hmuhchhuah hmasakberna a nih dawn avangin thutlukna siam turin a ti a. Hemi chungchangah hian Department chuan hmalakna tul ang te kalpuiin natna veia ngaih chenna hmunah JE natna awmtheih dan chi hrang hrang (epidemiology, entomological, environmental) te chhuina an nei leh a ni.

Trinity Hospital in investigation hrang hrang an tih tawhna report chu Central IDSP, NCDC, Delhi ah thawn a nih hnuah an lo zirchiang leh a, JE vei nia rinhlelh hi Mizorama JE case hmasaber ni turin an rawn nemnghet a ni. He hian hmalakna tur thil inchhawp te a awm avangin, Director, National Vector Borne Disease Control Programme, Delhi pawh an hriattir nghal bawk.

Japanese Encephalitis (JE)

Japanese encephalitis(JE) hi Flavivirus natna hrik ten an thlen a ni a, culex thosi ten heng natna hrikte hi an thehdarh a, he natna hi mihring leh mihringah inkaichhawn theih a ni lo. JE natna hrik virus te hian inthlahpun nan vawk leh tui lam sava te an hmang a, those chi khat (Culex) ten an thehdarh thin a ni.

JE natna vei tam berah a natna hia langchhuak lem lo (assymtomatic) a; lang chhuak tham a nih erawh chuan a veitu tan nunna chan mai a hlauhawm thei thin.

JE natna hi khawsik, luna leh luak te in a langchhuah hmasa a, rilru lam chianglo, thluak lam diklo, kaih leh tawng lama harsatna te a awm zui bawk thin. Zirchiannaa a lan danin lang thama JE natna vei za zela a sawmthum (30%) hialin an thihpui thei thin. Thluak vung natna (encephalitis) a thlen theih avangin thihpui mai pawh awlsam tak niin a thihpuilo te pawhin thluak/rilru lamah harsatna tam tak an nei zui thei bawk.

JE natna enkawl na turin hian damdawi hranpa bik a awm lova; natna lanchhuah dan ang zela enkawlna pek thin an ni.

JE natna thehdarhtu thosi Culex (tritaeniorhynchus, vishnui etc.) hi Mizoram chhung ah pawh a tam em em a; chuvangin he natna laka inveng tur chuan thosi seh kan pumpelh a pawimawh ber a, heng a hnuaia tarlante hi kan zawmthat chuan JE natna lakah kan inveng thei dawn a ni.

1. Personal protection measure hrang hrang, thosilen zarthat, thosi duhloh inchulh (odomos etc.) thosi thahna hlo chhit (Allout etc.) thawmhnaw phui thosi sehtlang theihloh hak.
2. Thosilen chiah, (insecticide impregnated) chauh hman tur a ni.
3. Thosi kah (DDT leh insecticide dangte)
4. Thosi pian theihna tuitling tih boral.
5. Mahni in leh a vel vawnfai