ZALEN March 23, 2025 : Zirna in pangngai ni chiah lo, refugee camp velah zirna hawnga Myanmar syllabus zirtir an awm tih hriat a ni a, a tul angin sawrkarin hma a la dawn.

Assembly budget session neih zawh taka T Lalhlimpuia, Lunglei West bialtu MLA zawhna, School Education Minister Dr. Vanlalthlana’n ziaka a chhan danin Mizoram sawrkar leh private school-ah Mizoram Board of School Education (MBSE) syllabus zirtir lo an awm hriat a ni lo a, hemi vang hian chiang taka heng ang school an awm hriat a ni lo.

Hetihlai hian school pangngai chiah lo, refugee camp velah zirna hawnga Myanmar syllabus zirtir an awm hriat a ni a, data dil mek niin a tul angin sawrkar-in hma a la ang.

Sawrkar-in a chhinchhiah laiin Bangladesh atanga raltlan mi 2,217, Manipur atanga raltlan 2,633 leh Myanmar atanga raltlan mi 33,505, an vaiin mi 41,355 Mizoramah an awm mek.

Mizoram sawrkar hnuaia school ni lo, school thenkhat, MBSE syllabus ni lo zirtir an awm a, chungte chu, Mizoram Institute of Comprehensive Education (MICE), Jawahar Novadaya Vidhyalaya (JNV), Eklavya Model Residential School (EMRS), Sainik School leh Kendrya Vidhyalaya te an ni.

Class X zirlai class IX zirtir daih te, class XII zirlai class XI a zirtir daih ang chi te official a report dawn a awm lo a, report a awm a nih chuan a tul angin sawrkarin hma a la bawk ang.