ZALEN March 12, 2025 : African Swine Fever (ASF) vangin ni 77 chhung chu Mizoram-ah vawk thi report a awm tawh lo a, kuminah he natna vang hian Vawk thi an awm rih lo a ni.

ZALEN thudawn danin ASF vanga vawk thi awm hnuhnung ber chu December 23, 2024 kha niin hemi ni hian Kolasib district, Saipum-ah vawk pakhat a thi a, hemi hnu hian vawk thi leh suat an awm tawh lo. Nimin khan a ni 77 na chiah a ni.

AH&Vety department chhinchhiah danin nikum chhung khan Mizoram-ah ASF vangin vawk 14950 an thi a, a vei nia rinhlelh vawk 24,177 suat a ni bawk.

Mizorama ASF hmuh hmasak ber chu March 21, 2021 niin Lunglei-a Lungsen-ah eng emaw zat an thi a. ASF vang hian kum 2021 khan 33,417 thiin kum 2022 khan 12,761 thi lehin kum 2023-ah 1,039 an thi leh a. Nikum khan Champhai district Leithum khuaah vawk an thi hmasa ber a, ASF vang hian February 9, 2024 khan he khuaah hian vawk 15 an thi nia thudawn a ni.