ZALEN May 18, 2025 : Mizoramah kum 1984 atanga kumin May 16 thleng khan ruihhlo vanga thi mi 1,904 an awm tawh a, kumin bikah ruihhlo thihpui mi 25 an awm leh tawh.

Excise & Narcotics Department (END) chhinchhiah danin kuminah ruihhlo vanga thi mi 25 an awm tawh a. Ruihhlo vanga thite hi mipa 25 leh hmeichhia panga an ni a, heroin leh damdawi dang tihpawlh hman sual vanga thi an ni.

Nikum chhung khan ruihhlo hman sual vanga thi mi 67 an awm a, mipa 58 leh hmeichhia pakua an ni.

Ruihhlo ti thinte thihpui tam ber hi heroin a ni a, a bak dang pawh hi heroin leh ruihhlo dang tikawpte an ni.

Kum 1984 atanga kumin thlengin Mizoramah ruihhlo vanga thi mi 1,904 an awm tawh a, chung zinga 1,671 chu mipa niin hmeichhia 233 an awm bawk.

Chhinchhiahna atanga a lan danin kum 2004 kha ruihhlo vanga thi an tam ber kum a ni a, hemi kum hian damdawi hman sual vangin mi 143 an thi a ni.

END chuan tunlai hian Mizoram district tinah zan tin special drive an nei mek a, zu leh ruihhlo dap chhuah tumin hma an la thin.

END hian kuminah May 8 thleng khan heroin kg. 23.593 an man tawh.

END hian kumin January 1 atanga May 8 thleng khan heroin bakah, methamphetamine kg. 44.111 an man a, rakzu litre 25,862.640 leh sapzu tam tham tak an man bakah, ruihhlo dang eng emaw zat an man bawk.

Ruihhlo an man kaihhnawiah hian mi 2,737 an man a ni.