Aizawl July 18, 2022 : Inrinni, July ni 16, 2022 khan Mizorama a vawikhatna atan Trinity Hospital, Silaimual-ah Lung zai (heart surgery) a ni a, July ni 17 (Sunday) khan damlo dang 2 an zai leh bawk. Dr Rahul Chandola, Cardio-Thoracic and Vascular Surgeon (CTVS) leh a team-ten lung natna nei te hi an zai a ni.

Dr Rahul Chandola, Cardio-Thoracic and Vascular Surgeon (CTVS) leh a team-ten lung natna nei mipa kum 59-mi hi zai hawngin, heart surgery chi khat - Coronary Artery By-pass Graft (CABG) Surgery hlawhtling takin an nei. 

Dr. Chandola chuan an damlo zai hmasakber hi High Risk Cardiac patient, (serious tak) niin a Lung chawmtu thisen dawt engemaw zat a pin avangin thisen a kal thei lo a. Lung hnathawh dan (heart function) chu nasa taka tlahniamin, 25% vel chauhin niin a sawi. Zai hnuin a ziaawm hle nia a hmuh thu a sawi a. ICU-ah dah nghal a ni a, a dinhmun hi uluk takin Dr. Chandola Team-ten an vil reng a. Damlo hi discharged theih a nih hma chuan he Medical Team hian an vil zui dawn tih a sawi bawk. 

Trinity Hospital Director, Dr. Lalrintluanga Jahau chuan rei tak an lo tum leh suangtuah, Mizoram ngeia lung natna zai theih a ni ta chu Pathian hruaina liau liau nia a hriat thu a sawi a. Hemi atan hian “Cardio Thoracic Lab” an din bakah heart bypass surgery atana khawl pawimawh – Heart-Lung Machine, Inter Aortic Pump leh Cardiac Anaesthesia Workstation te pawh tunhnaiah Trinity Hospital-ah hian bun thar an ni bawk. 

Dr. Lalrina chuan, Inzaina man pawh hi phai lam aiin a tlawm zawk mai theih thu a sawi. He heart surgery atana thisen mamawh te Civil Hospital, Synod Hospital leh ZMC-a Blood Bank-ten phal taka an ngaihtuahsak avangin heng damdawi-in thuneitute leh thawktu-te chungah lawmthu a sawi a ni. 

Damlo hi Dr. Rahul Chandola ( CTVS), Dr. O.P.Sinha (Cardiac Surgeon), Dr. Jitendra Chauhan (Cardiac Anaesthetist), Dr. Avinash (Perfusionist), leh Delhi atanga an rawn hruai nurse team-ten darkar li chuang an khawih a, a thisen dawt ping hmun thumah by-passed a ni. Trinity Hospital Medical Team pawhin phai lam Medical Team hi an tawiawm bawk. Dr. Chandola leh a team te hi thla-tin Trinity Hospital hi an tlawh tawh dawn a ni.