ZALEN July 22, 2025 : Wai Wai noodles siamtu CG Foods (India) Private Limited te chuan vawiin khan Aizawl Press Club-ah chanchinbumite an kawm a, an thil zawrh ngaihlutu Mizo mipui te chungah lawmthu an sawi a, Mizorama plant din chungchang te pawh an rilru-ah a awm thu an sawi.

Mizorama Wai Wai siamna din chungchanga zawhna chu CG Foods (India) Private Limited Managing Director Varun Chaudhary chuan, an rilru-ah a awm a ti a, Tun dinhmunah chuan kawng te duthusam a nih loh avangin an ngaihtuah rih lo a tih rualin, Rel te hi a rawn luh a, bungrua te duh anga an lalut theih a nih chuan plant din chu an la ngaihtuah ang, a ti.

CG Foods (India) Private Limited Managing Director chuan Mizoram chu India ramah Wai Wai ei nasa pathumna an ni a ti a, Assam chu pakhatna niin West Bengal chu pahnihna an ni tiin, mihring tam lam ang zawnga chhut chuan Mizoram chu Wai Wai eina sa ber an ni a ti. Mizo mipui ten an thil siam an ngaihnat avangin lawmthu a sawi bawk.

CG Foods chuan India ramah plant 7 an nei an ti a, Mizoram-a noodles hralh zat-a 50% aia tam mah Wai wai hi hralh niin an hria a, hei vang hian Mizo mipui chungah lawmthu an sawi a, an thil siam ngainatu Mizo mipui te pawh an ngainat thu CG Foods (India) Private Limited Managing Director Varun Chaudhary chuan a sawi a ni.

Wai Wai hi Mizoram-ah kum 30 kalta atanga rawn lut a ni a, tunah hian Aizawl-ah Distributor 16 an nei mek a, heng dawr te nen hian kum 20-25 vel te an indawr tawh niin an sawi.