ZALEN June 28, 2026: April, 2014 atanga June 12, 2026 thleng khan Mizoramah zu kaihhnawih vanga thi 325 an awm tawh a. Zu chhe in vanga thi mi 56 chhinchhiah ni tawh bawkin chhinchhiah chinah zu vanga thi 381 Mizoramah an awm tawh.

Excise & Narcotics Department (END) chhinchhiah danin zu kaihhnawih vanga thite hi mipa 279 leh hmeichhia 46 an ni a. Mizoram district hrang hrang zingah Kolasib district-ah tam berin 142 an awm a. Mi 70 thi awmna, Champhai district leh Serchhip district 57 awmna chu pathumna a ni a, Aizawl district chu palina niin thi 33 an awm a. Hetih lai hian Hnahthial leh Saitual district-ah chuan zu vanga thi an awm lo nia chhinchhiah a ni.

Zu kaihhnawih vanga thihna hi nikum khan thleng tam berin tum 94 a thleng a, hemi kuma thi zinga 81 hi mipa niin hmeichhia zu vanga thi 13 an awm bawk.

Kuminah hian zu vanga thi chhinchhiah mi 18 an awm tawh a, heng zinga 16 hi mipa niin hmeichhia pahnih an ni a. Kumin chhunga zu kaihhnawiha thite hi Lunglei district-ah pali, Champhaiah pariat, Kolasib-ah pali leh Khawzawlah pahnih an ni.

Kum 2019, 2020, 2021 leh 2022-ah zu vanga thi chhinchhiah an awm lo a, hetih lai hian tun hnai kum thum - 2023-ah 56, 2024-ah 66 leh kum 2025-ah mi 94 te an thi nia chhinchhiah a ni.

Hetih lai hian kum 1997 atang khan zu chhia (spurious liquor) in vanga thi mi 56 an awm tawh niin END chuan an chhinchhiah a, heng zinga 49 hi mipa niin hmeichhia pasarih an awm bawk a. Zu chhe in vanga thite zinga 36 hi methylated spirit vang a ni a, paruk hi BEDC in leh pahnih hi pethidine in vang niin a dang 12 hi an zu in hi chiang taka hriat a ni lo.

Zu chhe in vanga kum khata thih tam ber kum chu 2001 kha niin mi 14 an thi nia chhinchhiah a ni a. Zu chhia in vanga thihna thleng chhinchhiah hnuhnung ber chu kum 2022 kha niin hemi kum hian mi pakhat a thi a ni.

END chuan June 2, 2026 khan hriattirna tichhuakin hriselna kaihhnawih avanga zu kawl leh zu in phalna, ‘Red Card’ permit a dil theih tih thuchhuah an siam a. Thudawn danin department chu Red Card hmanga IMFL hralh chhuak tur hian engkim peih fel a ni tawh a ni.