Aizawl: Tunhnaia Kolasib district a ar engemaw zat thih chhan chu bird flu ni lovin ar natna chi khat RD a ni tih Vety department chuan an sawi.
Zalen in AH&Vety department thawktute hnen atanga thu a dawn danin India ram state 10 a leng mek bird flu chu Mizoramah hmuh tur a la awm lova. Tunhnaia Kolasib chhehvel leh Bairabi vela ar engemaw zat thihna pawh ar thi post mortem anih hnuah bird flu a ni lo tih an finfiah tih an sawi.

AH&Vety department chuan state dang atanga ar leh ar chaw lakluh an khap lo nia sawiin mahse bird flu lenna hmun atanga lakluh erawh phal a ni lo tih an sawi a. "Bird flu lenna hmun atanga ar, ar note leh ar chaw lakluh chu a rem lo a. State dang atanga lalut tur te chuan an lakluhna tur hmun chiang taka ziakin Vety department hriatpuina nen chauh lakluh theih a ni," Dr. Lalhmingthanga, Joint Director chuan a ti.

Bird flu leng mek chu chi hnih a awm nia sawiin H5N* chu mihring tan a hlauhawm loh a, a chi dang H5N1 erawh mihring tan a hlauhawm thei nia sawiin Dr. Lalhmingthanga chuan, "H5N1 hi mihringin a kai chuan a vei zinga 60% in an thihpui a, mahse vanneihthlak takin India ramah chuan hri kai sawi tur an la awm lo a ni," a ti a. Bird flu chu a hlauhawm leh loh nia sawiin, "He hri hi 70 degree celcius ah chuan an thi vek a, kan thil ei turte hmin tha taka kan siam chuan mihring tan a hlauhawm loh a. Artui leh thildang te a hel chuan ei loh a him ber a ni," a ti bawk.

Bird flu chu sava pem chi ten an pudarh thin tih sawiin Dr. Lalhmingthanga chuan, "Sava pem chi ten Mizoram an rawn tlawh leh tlawh loh lo chhinchhiah turin Forest department ruat an ni a, sava thi an awm chuan an thihchhan chhuichian vat tur a ni ang, " a ti bawk.

Tunhnaia thenawm state a leng, vawk natna chi khat African Swine Fever (ASF) chu Mizoramah hmuh a la ni lo tih Vety department thawk te chuan an sawi a. District thuneitute nasa taka an tan avangin lawmawm an tih thu sawiin ASF lenna Assam leh Meghalaya ah te hri hi an control tawh nia an hriat thu an sawi bawk.