Aizawl June 27, 2024 : Vawiin khan Mizoram Co-operative Apex Bank chuan an Corporate Social Responsibility (CSR) atangin Mizoram Journalists Association (MJA) hnenah MJA Library a hman tur Computer Set leh Printer an pe. Apex Bank lam chuan Mizoramah CDR nei tha ber an nih thu an sawi.

He thilpek hlanna neih rual hian MJA hruaitute leh Apex Bank Board of Directors leh Senior Officer te chuan inkawmkhawmna an nei a, Apex Bank lam hian an dinhmun te an sawi.

Apex Bank hi ni 31.7.1982 a din a ni a. Tunah hian Branch 28 neiin, thawktu nghet mi 165 an awm a, thawktu zawng zawng hi an vaiin Mizo vek an ni a, Mizoram Bank lian zinga Mizo ni lo thawktu awm lohna Bank awmchhun a ni.

Apex Bank neitu nihna hi Mizoram Sawrkar leh Mizo Mipuite tan chauh neih theih a ni.

Kum 2023-24 chhung khan Deposit Cheng nuai 1,50,757.54 dawngin, Loan cheng nuai 1,17,212.84 an pe chhuak a, hlep cheng nuai 4,246.47 an nei a.

Ni 31.3.2024-a an Credit Deposit Ratio hi 77.75% a ni a. Capital to Risk Assets Ratio (CRAR) hi 28.11% a ni. Vawiin khan CDR hi 79 % a kai hman a, Mizoram Bank zingah CDR nei tha ber an nih thu an sawi.

Apex Bank hian ATM 34 bakah Mobile ATM 2 a nei a, Mizoram-ah SBI tih lovah chuan ATM ngah ber an ni. Apex Bank ATM Display hi Mizo tawng leh Sap tawnga tarlan a niin, ATM-a Mizo tawng hmanna awmchhun a ni

Apex Bank hian Branch a neih lohna khuaah pawh Primary Agriculture Credit Cooperative Society (PACS) te kaltlangin Banking Services a pe a, Mizoram hmun hrang hranga PACS-te hi Apex Bank-in a vil reng a ni.

Apex Bank hian hlawkna a hmuh zawng zawng hi Mizoram chhungah chauh a hmang a ni.