Aizawl July 22, 2023 : Aam Aadmi Party (AAP), Mizoram chuan khawvel titi chang chho ta, Manipur-a Meitei leh tlang mite inkara buaina chhuak chungchangah Central leh Manipur state-a rorel lai Bharatiya Janata Party (BJP) chu an mawhphurhna hlen zo lo leh khua leh tuite humhim zo lovah an ngaih avangin Mizoram BJP Office, Upper Republic, Aizawl bula Peaceful Demonstration an huaihawt tih an sawi.

AAP chuan, "Kan tih chhan ber chu Manipur buaina chungchangah India leh Manipur-a rorel lai BJP hmalakna kan duh khawp loh vang a ni. He mi chungchangah hian Mizoram BJP hian buaina ti reh turin theihtawpin Central-a sawrkar lai BJP nawrin, hma la se kan duh a, kan duhna ti langin kan pungkhawm a, buaina siam emaw, harsatna siam emaw kan tum lo a ni. Mizoram BJP pawhin Central lama an hotute bia a, remna leh muanna a awm theihna turin tun aia nasa zawka hma la turin kan phûttlat bawk a ni," an ti.

Inrem tlanga taka awm an duh ti sawiin, "Manipur-ah hian Zo hnahthlak tam tak an awm a, Mizoram mi leh sa ngei ngei pawh tunah hian mi engemawzat an awm mêk a, hetiang hi a nih avangin Mizoram chhunga buaina ti punlun zawng emaw, hmun danga awm Zo hnahthlak unaute himna tiderthawng thei zawnga hmalak tha kan ti lo va, kan zavaia inrem taka kan awm tlan hi kan duh ber a ni," an ti bawk.

Manipur buaina avanga mahni in leh lo tlansan a, Mizoram chhunga himna zawng Zo hnahthlak zawng zawngte an tawrhpui a, anmahni buaipuina kawnga Central YMA leh NGO hrang hrangte hmalakna an thlâwp tlat thu leh an tan hian an tih theih apiang tih an inhuam thu an sawi bawk.