ZALEN August 6, 2025 : FCS&CA Minister B. Lalchhanzova leh MLA ten NH 06 siamthat mek chu a hmunah a en. Minister hian kawng chhiat zualna lai deuhah te ding zelin hnathawh kalpui mekte a enpui a, hnathawktute chu theihtawp an chhuahnaah lawmthu hrilhin kawng an siam mawlh mawlh chu fakawm an tih thu a sawi. 

Minister hian Thlanvawng kawna box culvert dah mek te, Buichali peng thlen hmaa kawng chhe zual lai te, Mualkhang Nazareth Veng te, Khamrang peng atanga km 2 bawr vela kawng chhe lai te, Zatawna petrol pump bula kawng siam lai te, Mega Food park bul bawra kawng chhe laiah te leh hmun dangah te hnathawh kal mek chu enin thawktuten harsatna an tawh te a ngaithlaksak a. 

YMA Branch kawng siama hnatlang :- Sairang, Mualkhang, Khamrang, Mualvum leh Bualpui Branch YMA te hnenah sawrkarin hnatlang a puihna sumfai a hlan a. Driver tangkhangte chhawmdawl nana Sawrkarin ration package a siam pawh Kolasib Sub-Hqrs YMA te kaltlanga sem zel niin, Minister hian Kawnpui-ah mi engemawzat hnenah a hlan nghal bawk. 

Driver tangkhang ration package - Buhfai, Dal, Alu, Ael leh Purunsen pek chhuah hi mi 492 an ni.

B. Lalchhanzova chuan Mizo tlawmngaihna YMA kaltlanga lo lang leh ta chu lawmawm a tih thu sawiin, sawrkar lam nen theihtawpa tanrual zel a pawimawh thu a sawi a. 

Minister hian driver tangkhangte pawh kawmin chhel taka an awm chu a fak a, kawngpui chak zawka siam a nih theih nana NHIDCL leh Mizoram sawrkarin ruahmanna an lo siam chu theih anga chaka an kalpui mek thu leh, tangkhangte pawh an chhuah vat a beiseipui thu a sawi a ni. 

Kawng siam hi Fak hlawh lo Val Rual- lirtheia ei zawng te leh an pawl hruaituten an endik ve bawk.

Kawnpui PS-ah PWD thawktu te, Kolasib Police hotute leh lirtheia eizawngtute nen vawina kawng siam an enhona chungchang sawiho lehin hmalak zel dan tur an sawihozui nghal a ni.