ZALEN February 6, 2025 : Ministry of Development of North Eastern Region (DoNER) buatsaih, Chennai-a North East Investors Summit-a thusawitu Lalnghinglova Hmar, LESDE / Sports & Youth Services Department minister chuan Mizoram chu investor-te tana hmun tha, hmasawnna hnathawhna tura kawng hawng zautu a nih avangin Mizoram tlawh tur leh Mizoram lam hawi turin investor summit-a kalte a sawm.

Nimin khan DoNER Ministry buatsaihin Chennai-ah investor-te inhmuhkhawmna hun hi neih a ni a, DoNER Minister Jyotiraditya Scindia leh Mizoram LESDE Minister Lalnghinglova Hmar-te'n thu an sawi. Lalnghinglova Hmar chuan Mizoramin tun hnaiah thlai a thar thahnem dawn a, a bikin sawrkarin lei a intiam tawhna - Sawhthing, Hmarcha, Aieng leh Hmunphiah te lei tur a awm dawn tiin a hlawma lei duhte tan Mizoram sawrkarin kawng a hawng zau zel dawn tih a sawi a, Mizoram sawrkar chuan kuthnathawktute bana a kaih thu a sawi lang.

Mizorama sawhthing chi hnih - Thingpui leh Thinglaidum bakah Mizo Hmarcha chuan GI tag an neih tawh thu leh hmun danga hralh chhuah tlak an nih thu a sawi a; a hralhna kawnga thawhho bakah a sawngbawlna tur din tura thawhpuiah investor liante chu a sawm bawk.

Lalnghinglova Hmar chuan Mizoramah mau a tha duh em em tih sawiin tun aia tangkai zawka sawngbawl tura thawhho puiah industry neitute a sawm bawk a; DoNER Minister pawhin India hmar chhak chu mau tamna leh țhat duhna a nih angin a hmun ngeia kal chilh a, zir chiang a, hmang tangkai turin industry neitu kal khawmte a chah.

Sports minister chuan India hmar chhak chu sports lama theihna nei sang tak a nih thu leh India-in kum 2036 Olympics thlen a tumna kawngah hmar chhak state-ten tha an thawh theih dan chu tun atanga infiammite inbuatsaih tan a nih thu a sawi a, chumi kawngah chuan DoNER bakah private investor-te thawhpuiah a sawm bawk.

Mizo thalaite state pawna hnathawka an chhuah nasat thu leh, a bikin hospitality service lamah hnuhma an neih that thu kal khawmte a hrilh a, hei hi lian thama kalpui turin investor tha mamawh a nih thu a sawi lang.

DoNER Minister pawhin hmar chhak state hmasawnna tura sorkar laipuiin ruahmanna a neihte leh duhsakna a pek dante a sawi a, Tamil Nadu state-a investor-te chu a taka hmar chhak state tlawh a, a theihna sang tak hai chhuah kawnga pui turin a sawm bawk a ni.