Aizawl: Mizorama COVID 19 positive case hmuhchhuah tawh zawng zawng 361 atanga 156 chu Force mi (BSF/AR/NDRF /Army) an ni a, hei hi a vei zat atanga chhutin 43.21% a ni a. Civil mi vei 205 awmin hei hi a vei zawng zawng atanga chhutin 56.79% a ni. Nimin thleng khan COVID-19 vei mek 178 awmin an zinga 141 (79.21%) chu Force mi (BSF/AR/ NDRF/Army) an ni a, civil mi vei mek 37 (20.79%) an awm bawk. Mizorama COVID-19 tihdam zat (recovery rate in Mizoram) chu 50.69% a ni.

Zirtawpni khan ZMC laboratory-a swab sample 238 test ah COVID-19 positive thar 28 hmuhbelh a ni a. Kolasib district-a Counter Insurgency and Jungle Warfare School (CIJWS), Vairengte hnuaia Lailapur quarantine centre a awm mek sipai pakhat chu Rapid Antigen Test hmangin COVID-19 positive a ni tih hmuhchhuah a ni bawk.

ZMC laboratory-a COVID-19 positive thar hmuhbelh te hi an vaiin mipa vek an ni a. Border Security Force (BSF) sipai 28 niin, kum 25-52 inkara upa, India ramchhung hmun hrang hrang atanga lo haw khawm an ni a, quarantine facility a awm lai vek an ni.

Kolasib District a COVID-19 hmuhchhuah thar hi Rapid Antigen Test hmanga finfiah niin amah hi CIJWS a sipai, kum 29 a upa a ni a, Lailapur Quarantine Facility a awm niin Military Hospital, Masimpur ah dah luh a ni. CIJWS, Vairengte hian Quarantine Facility hmun hnih ah an nei a, Vairengte-a CIJWS hmun-ah sipai nilo staff dang an quarantine a, Lailapur-ah sipai ho an quarantine thin thung a ni. COVID-19 positive hmuhchhuah tharte hi hnamdang sipai vek an ni. ICMR advisory angin Rapid Antigen Test positive hi COVID-19 positive (true positive) an ni a. Finfiah tura ZMC RT-PCR lab-a sample thawn a ngai tawh lo.

Lunglei Civil Hospital a TrueNat laboratory-ah Zirtawpni khan sample 25 test a ni a. Heng zingah hian Quarantine Facility a awm mekte leh thawktute bakah midang sample pahnih test a ni a. CCC, SIRD Pukpuia awmte sample 3 test (repeat test) tel a ni bawk. Repeat test te hi BSF mi niin an la positive rih a ni tih finfiah a ni a, a dang zawng mi 22 sample test result a negative a. COVID-19 positive thar hmuhchhuah a ni lo.